كحك عجوة وعجمية على طريقة الشيف جيهان رشاد في رمضان بالهنا
تستعد أغلب البيوت لاستقبال عيد الفطر المبارك، ومن أهم العادات المصرية منذ عصر الفراعنة خبز الكحك والبسكوت، وتجتمع سيدات العائلة على طاولة واحدة من أجل الاحتفال بطقوس الخبيز الشهيرة، ولكل بيت طريقة تحضير خاصة بكحك العيد وحشوات مختلفة، لتبقى كل سيدة منفردة بأسرارها الخاصة فى مكونات كحك العيد.
حشوات كحك العيد
وتحدثت شيف جيهان رشاد عن الحشوات الشهيرة لكحك العيد، وذلك فى حلقات خاصة من برنامج رمضان بالهنا، علي آخر خبر TV، وقالت : النهارده هعمل معاكم حشوات كحك العيد، وأكتر طريقتين أغلب البيوت بيفضلوهم، هما العجمية والعجوة.
شاهد بالفيديو ..
هحضرهم معاكم بطريقة سهلة أوى ، هتغنيكي عن شرا الكحك من أي محل بمبالغ ضخمه من غير داعى.
مقادير كحك العجمية
عسل أبيض - سمنة - ريحة كحك
طريقة تحضير حشوة العجمية
طبعا احنا حضرنا عجينة الكحك الأساسية، دلوقتي فى حلة علي النار هنضيف كوباية عسل أبيض، وانزل عليها سمنة بلدى، ورشة بسيطة من ريحة الكحك.
هنقلب المكونات لحد ما نبدأ نعمل خط فاصل ونلاقيه واضح في الحلة.
هنسيب العجمية تبرد تماما، وبعدين نبدأ نعمل كور صغيرة، ونضيفها كحشوة للكحك.
وبنفس الطريقة هنعمل صواني كحك العجمية ونقدر نعملها شكل مختلف عشان نعرفها، وتدخل الفرن علي أعلي درجة حرارة لمدة ربع ساعة تقريبا، بحيث الوش يكون اخد لون دهبى والضهر كمان.
طريقة تحضير حشوة العجوة
-فى حلة علي النار هضيف التمر منزوع النوى، وهنزل عليه سمنة بلدى ونقلب كويس أوي.
-دلوقتي هضيف السمسم ومعلقة صغيرة من ريحة الكحك.
-هنسيبه يبرد خالص، ونبدأ نشكله ، ونضيف حشوة العجوة علي الكحك، وبرضو بنفس طريقة كحك العجمية، هنشكل بنشقوش مختلفة عشان نعرفه.
تقديم كحك العيد
واستكملت : طبعا طريقة تقديم كحك العيد بتكون فى طبق كبير وبنرش سكر البودرة عليه وقت التقديم، مع كوباية شاى بلبن، أو شاى أول يوم عيد وكل سنة وانتم طيبين.
