لو Gen Z عندهم عزومة فى رمضان يلبسوا إيه؟ .. لميس خليل توضح
يبحث دائما جيل Z عن ملابس مريحة فى ستايل الملابس الخاص بهم، لذلك نجدهم يفضلون ستايل الـ oversized look، ورغم ظهور العديد من الأفكار والتقاليع المرتبطة بموضة كل فصل، إلا إنهم لا يهتمون بما هو دارج، لكنهم يرفعون شعار الراحة أولا، فهم يبحثون عن ما يناسبهم من الموضة وليس العكس.
لذلك يجد الكثير من الأهالي صعوبة فى إقناع أولادهم باختيار ملابس مناسبة للأمكان التى يترددون عليها خصوصا فى عزومات شهر رمضان.
Gen Z بيميلوا للبساطة
وتحدثت الاستايلست لميس خليل عن تقاليع Gen z فى لبس عزومات رمضان، وقالت فى حوار خاص لـ آخر خبر TV : الجيل دا الأغلبية العظمى منهم مش بيحبوا يلبسوا قفطان والحاجات دي، وهما بيقولوا دا دايما، مش عايزين يخرجوا برا الـ comfort zone بتاعتهم، هما مرتاحين فى الهودى والبنطلونات الواسعة.
شاهد بالفيديو ..
كل مكان له ستايل لبس معين
وتابعت : طبعا حقهم يحسوا بالراحة فى الـ oversized look ولكن دا لو إنتى رايحه النادى أو رايحة تذاكرى مع صحابك، أو رايحة خروجة مع واحدة صاحبتك، بس خروجات مع الأهل بنكون محتاجين نخرج شوية من منطقة الراحه دي.كل مكان بُحتم عليكي الستايل بتاعه.
أفكار لبس لخروجات رمضان
تابعت: يعني دلوقتي لو معزومين علي السحور أو الفطار، ماينفعش تلبسوا هودى وبنطلون واسع قطن، ممكن نستبدله ببنطلون جينز واسع، وعليه مثلا cropped trench coat، دا طالع موضة أوى، كمان في الـ leather jacket هما بيحبوه جدآ، هيكون مناسب لخروجات رمضان وعليه بنطلون واسع.
ممكن بقى لو حابين يضيفوا إحساس مختلف للوك مناسب لرمضان، يفضل يلبسوا حلق أو شنطه أو شال مثلا مرتبطين بستايل رمضان، شكلهم هيكون مختلف وشيك أوى.
بداية ظهور ترند القفطان
وفى سياق متصل تحدثت لميس خليل عن بداية ظهور ترند القفطان وارتباطه بشهر رمضان وقالت: عايزة أقول بمناسبة القفطان وارتباطه بشهر رمضان، أنا شخصيا ليا صحاب عايشين برا مصر، بقوا يجوا مخصوص قبل رمضان عشان ياخدوا القفطانات المميزة اللي عندنا ويروحوا بلادهم يلبسوها، ورغم أن القفطان مش اصله مصرى طبعآ، والمغاربة أكتر شعب مشهورين بيه، بس أنا شايفة إن المصريين بيتفقوا على نفسهم فى تصميمات وتقاليع القفطان فى شهر رمضان كل سنة عن التانية.
موضة ألوان وخامات قفطان رمضان
وبالنسبة لموضة القفطان اللي بنشوفها، خلينى أقول إن مصممين الأزياء مش بياخدوها كدا وخلاص، لأ دا فى أقمشة وألوان وقصات بيرتبطوا بيها مع كل سنة بالتزامن مع موضة الصيف أو الشتاء، يعني مثلا هتلاقى الفرو وألوان زي البنى منتشرة فى قفطان رمضان ٢٠٢، عشان هما موضة الشتا أصلا.
