أسعار حلويات رمضان VS ميزانية البيت .. شيماء فوزى تُجيب
تتنافس كُبرى محلات الحلويات فى شهر رمضان علي الانفراد بأصناف حلويات خلال الشهر الكريم، ولأن الحلويات أصبحت تريند رمضان كل عام، بدأ الكثيرون يشتكون من غلاء أسعار الحلويات الرمضانية، الأمر الذى يؤثر بشكل كبير علي ميزانية البيت، فهناك بعض الحلويات التي تصل أسعارها لنفس سعر سفرة إفطار رمضاني.
حلويات رمضان مبالغ فى أسعارها
وتحدثت دكتور شيماء فوزى الكاتبة والباحثة فى مجال الإدارة، عن كيفية التعامل فى العزومات مع أسعار الحلويات الرمضانية المُبالغ فى أسعارها، وقالت فى لقائها مع آخر خبر TV، في تصريحات خاصة : عايزة أقول أن أشيك حاجة وأقيم حاجة فى كل مكان وفى دول العالم، الأكل اللي بنروح لعزومة بيه، معمول فى البيت، يعني أكيد فى مشكلة كبيرة إنك تروحي تشترى صينية بسبوسة برقم كبير، وتاخد تمن ميزانية البيت فى شهر رمضان، دا أكيد غلط، فمثلا الدولة موفرة معارض زي أهلا رمضان لكل السلع الاستهلاكية والمكسرات علشان رمضان، كلها أسعار أقل من السوق، وكلنا لازم نلجأ لمعارض الدولة فى المناسبات لأنها بتفرق فى الميزانية.
شاهد بالفيديو ..
حلويات معمولة فى البيت
استكملت: إنتي كمان لازم تفكرى قبل ما تقررى تشترى حلويات مبالغ فى أسعارها مع كل عزومة رمضانية، مافيش مشكلة انك تختارى صنف حلو شاطرة فيه وتقديمه بشكل شيك وانتى داخله لمكان العزومة و تقولى "كل سنة وانتم طيبين، دى عمايل ايديا يارب يعجبكم".
وخليكي متأكده ان مجهودك عشان عملتى حاجة عمايل ايديك، هتكون مقدرة من الناس اللي حواليكي وفى العالم كله بيعملوا كدا، قدموا اللي تقدروا عليه.
أفكار غير الحلويات فى العزومات
اضافت: عايزة أقول كمان إن الحلويات مش شرط هي اللي ندخل بيها لو معزومين، معارض الدولة موفرة أفكار مختلفة مرتبطة برمضان، زى المفارش وديكورات رمضان الجميلة، ودى هدية تعيش العمر كله، ويفضل العازم فاكر إنى اديته هدية مميزة لبيته، مش مجرد حلويات تريند.
عزومة واحدة للمقربين كفاية
وتحدثت دكتور شيماء فوزى الكاتبة والباحثة فى مجال الإدارة عن العزومات فى رمضان وقالت: العزومات المستمرة طول شهر رمضان مرهقة جدآ لميزانية أي بيت، والحل إننا نعمل عزومة واحدة متحضرة كويس، أو نعمل ديش بارتي يعني كل أسرة يشاركوا بطبق وبيتم تكوين سفرة كبيرة فيها كل الأصناف، فى بيت أحد الأشخاص بدون إرهاق ميزانية شخص واحد.
اختارى أطباق كبيرة فى العزومة
وتابعت : ولو مضطرة تعملي عزومة اختارى المقربين زى الأولاد والأحفاد، أما بالنسبة للأطباق فأفضل تختارى الأطباق المباركه، بمعنى الأطباق المصرية زي صواني الفتة، دي بتكون اقتصادية وبتشبع، أو تشكيلة محاشى، كمان صواني الرقاق مهم أوى على سفرة رمضان. كل دي أصناف مصرية بتعمل عزومة كبيرة وتملى العين وبتكفى من غير صرف كتير.
