المسموح والممنوع في حلويات رمضان .. آية هانى توضح
ترتبط العزومات فى شهر رمضان بالحلويات، فإذا كنت عازم أو معزوم، دائما ما تنشغل بالحلو، ويطرح السؤال بعد كل إفطار، هنحلى بإيه؟، ولأن حلويات رمضان دخلت فى سباق الترند، وكل محل يتفنن فى الخروج بنوع حلوى جديد بإسم غريب، أصبحنا نعانى من مشاكل صحية كبيرة خلال شهر رمضان بسبب كثرة السكريات.
تناول الحلويات بوعى
وتحدثت أخصائي التغذية العلاجية دكتور آية هانى، عن طرق تناول حلويات رمضان بشكل متوازن، وقالت فى حوار خاص لـ آخر خبر TV : أنا شايفة إن الحاجة اللى نفسنا فيها ناكلها، بلاش نحرم نفسنا منها، لكن ناكل صح، أنا ممكن أكل حلويات كل يوم، لكن مش الأصناف الغريبة اللي بنشوفها كل رمضان. الحقيقة بقالنا كذا رمضان بنشوف حلويات مكونة من طبقات على بعض، ملهاش علاقة ببعض فيها نسبة سكر عالية جدًا.
بلاش ترند حلويات رمضان
استكملت : يعنى نحاول مناكلش كل يوم مكس الحلويات اللى بنشوفه يوميا، دى تبقى فى العزومات، وعندى طلب من المعزومين فى رمضان، بلاش عادة إن كل الناس داخلة بحلويات، كل واحد صنف جديد، وبالتالي العازم بيفضل عنده كم حلويات باقى الأسبوع مش عارف يعمل فيهم إيه، خلينا نفكر فى هدايا للعزومات مختلفة، ممكن فاكهه أو مكسرات، عصاير فريش، لأن حرام كم الحلويات دي، وبالذات على الأطفال اللي فى البيت، هما معندهمش وعي وطالما الحلويات قدامهم عايزين يأكلو منها طول الوقت.
تعمل إيه لو نفسك فى حلويات
تابعت: لو نفسك تجرب حلويات جديدة، الحل إنك تاخد قطعة بعد الفطار علي طول، وبالتالي مش هتاكل كمية كبيرة، وممكن على فكرة لو أكلنا حلويات كل يوم نطلع من رمضان مش زايدين فى الوزن أو ثابتين، بس مش لازم الحلو يكون من النوع دا أو حلويات شرقية من برا ، ممكن نعمل قطايف أو كنافة فى الإير فراير فى البيت ، ممكن كمان كيك بالتمر بسكر دايت أو عسل نحل أو سكر قليل، كمان الخشاف حلو أوى أو طبق فروت سلاط، دي كلها بدائل صحية للحلويات، وفى العزومات بس ناكل الحلويات التانية.
