القطيفة تريند قفطان رمضان 2026 .. لميس خليل تُوضح
ارتبط القفطان بشهر رمضان الكريم، ومع بداية الشهر الكريم، تحرص الكثير من الفتيات على اقتناء قطعة أو أكثر من القفطان لتناسب العزومات سواء على الفطار أو السحور، فإذا كنتى تبحثين عن تريند قفطان هذا العام يمكنك التعرف على أبرز الخامات خاصة مع تزامن شهر رمضان مع فصل الشتاء.
القطيفة ترند قفطان رمضان
وتحدثت الاستايلست لميس خليل، عن أشهر خامات القفطان فى رمضان 2026، وقالت في تصريح خاص لـ آخر خبر TV : واحد من أبرز الخامات اللى هنشوفها فى قفطان رمضان 2026، القطيفة لأنه من الخامات الشيك قوى لما بتظهر علي الريد كاربت أو الخروجات والسهرات، وهنا مع القفطان كمان هيودى الاستايل في حته تانية خالص، غير أنه بيدفى ومناسب للشتاء فى رمضان، وممكن يتلبس تحته توب وبنطلون خفيف.
شاهد بالفيديو ..
الصوف والفرو والريش موضة القفطان
وتابعت : ومن الخامات اللي هنشوفها برضو فى رمضان غير القطيفة، الجلد فى القفطان، لكن القطعة مش كلها من القطيفة علشان مايقلبش بالطو، يعنى هنشوف ميكس بين الخامات، زى الجلد مع القطيفة، كمان الصوف والمفاجأة هنشوف الريش فى بعض التصميمات، رمضان دا هيكون سيزون مميز جدا لمصممين الأزياء فى رمضان.
بداية ظهور تريند القفطان
وفى سياق متصل، تحدثت لميس خليل عن بداية ظهور تريند القفطان وارتباطه بشهر رمضان، وقالت: عايزة أقول بمناسبة القفطان وارتباطه بشهر رمضان، أنا شخصيا ليا صحاب عايشين برا مصر، بقوا ييجوا مخصوص قبل رمضان علشان ياخدوا القفطانات المميزة اللي عندنا ويروحوا بلادهم يلبسوها، ورغم أن القفطان مش أصله مصرى طبعاً، والمغاربة أكتر شعب مشهورين بيه، بس أنا شايفة إن المصريين بيتفوقوا على نفسهم فى تصميمات وتقاليع القفطان فى شهر رمضان كل سنة عن التانية.
موضة ألوان وخامات قفطان رمضان
وأضافت : بالنسبة لموضة القفطان اللي بنشوفها، خلينى أقول إن مصممين الأزياء مش بياخدوها كدا وخلاص، لأ فى أقمشة وألوان وقصات بيرتبطوا بيها مع كل سنة بالتزامن مع موضة الصيف أو الشتاء، يعني مثلا هتلاقى الفرو وألوان زي البنى منتشرة فى قفطان رمضان 2026، علشان هما موضة الشتا أصلا.
