إزاي نستعد صحياً لشهر رمضان؟ .. آية هانى تُجيب
يعانى الكثيرون من مشاكل الصداع والعصبية فى الأيام الأولى من شهر رمضان الكريم، وذلك بسبب نقص السكر والكافيين إلي جانب المياة بشكل مفاجئ من الجسم، وتبدأ هذه الأعراض فى الاختفاء مع الأسبوع الثانى من الصيام، لكن هناك بعض الطرق الآمنة التي تساعد على بدء الشهر الكريم بدون أي مضاعفات.
نستبدل الكافيين بالأعشاب
وتحدثت دكتور آية هانى، أخصائي التغذية العلاجية، عن كيفية الاستعداد الصحيح لشهر رمضان، قالت فى حوار خاص لـ آخر خبر TV : أنا بشوف أن الأيام اللي قبل رمضان فرصة إنى أمهد جسمى لشهر رمضان، بلاش ندخل على مفاجأة أن كل حاجة إحنا بنعملها فى يومنا العادى اتمنعت، يعني نحاول نبدأ بشكل تدريجي بالعادات اللي بنعملها فى رمضان، إننا نهيئ جسمنا ليها من دلوقتي.
شاهد بالفيديو ..
أعشاب صحية
وتابعت : أولهم احتياج الكافيين، وبنلاحظ أغلب الناس عندهم عصبية وصداع بسبب قلة الكافيين، فمن دلوقتي ممكن نقلل إننا نبدل مشروب القهوة أول ما نصحي ونستبدله بأى مشروب أعشاب صحي بنحبه زى القرفة، الزنجبيل، ينسون، أو ممكن نأجل القهوة كام ساعة عن معادها ودا هيساعد علي تقليل الصداع فى أول أيام رمضان.
تأخير وجبة الإفطار ساعتين
وأضافت : تانى حاجة لازم جسمنا يستعد ليها قبل رمضان، هي احتياج السكر العالى فى رمضان، ودا هنعمله عن طريق تأخير وجبة الفطار، يعني لو بتفطر الساعة 9 نفطر 12 وهكذا، كأنى بعمل صيام متقطع بس بالعكس، عادة إحنا بنعمل صيام متقطع عن طريق إننا بناكل بالنهار وبنوقف الأكل بالليل دا الطبيعي، لكن قبل رمضان هنقلل الأكل الصبح، أو نأخر وجبة الفطار، ونرحل الأكل بالليل برضو، ودا هيساعدنا نكون أحسن كتير فى نهار رمضان وقت الصيام.
لازم نشرب مياه كل ساعة
وأكملت : وطبعاً المياه من أهم المشكلات اللي بتقابلنا فى رمضان، وللأسف بنعتقد إننا لما نتسحر ونشرب ماية كتير، كدا هنفضل محافظين على توازن المياه طول الصيام، لكن الحقيقية أن الجسم بيحتاج دا بالتدريج، وهيساعدنا منحسش بالعطش، عايزة أقول إن الماية دي زي المبنى بنبنيه واحدة واحدة، عشان كدا جسمنا كله بيحتاج ماية طول رمضان زي شعرنا وبشرتها، والأفضل إننا نمهد جسمنا للسكر والمياه واحتياج الكافيين، قبل رمضان علشان ندخل فى الصيام مرتاحين بدون صدمة.
