كنافة تيراميسو على طريقة ياسمين طايع فى رمضان بالهنا
دائماً ما يشغل جدول إفطار رمضان بال السيدات، وتقعن في حيرة كبيرة، طوال الشهر الكريم، ويبقى السؤال المكرر : هنفطر إيه النهارده؟، هو ما يشغل بال الكثيرين، وهو ما يجيب عنه آخر خبر من خلال برنامج رمضان بالهنا، والذي يقدم يومياً وصفة جديدة لمتابعي ومشاهدي آخر خبر TV.
حلو كنافة التيراميسو فى رمضان
وقامت الشيف ياسمين طايع، ضيفة الحلقة السادسة من برنامج رمضان بالهنا، بعمل وصفة كنافة تيراميسو، وأكدت ياسمين أن وصفة الكنافة بالتيراميسو هي من الحلويات الشرقية غربية، وتعتبر من الحلويات السريعة والبسيطة التي يمكن تحضيرها فى رمضان.
مكونات وصفة كنافة التيراميسو
المكونات : كريمة لبانى- جبنة كريمى-سكر -فانيليا- كنافة -عسل أبيض -بسكوت سافورى -قهوة سريعة الذوبان- كاكاو خام- ماية.
شاهد بالفيديو ..
طريقة تحضير حلو التيراميسو
-هنقوم بخلط الكريمة اللبانى بنسبة ٧٠% فى المضرب السلك، أول ما بتبدأ الكريمه فى التماسك، هنضيف الجبنة الكريمى، وبعد كدا السكر والفانيليا، وبكدا خليك الجبنة الكريمي جاهز.
-الخطوة التانية هنقوم بتجهيز الكنافة، أنا هستعمل كنافة متحمصة، بنجيبها ونضيف عليها سمنه وندخلها الفرن أو الاسهل نحطها فى الاير فراير.
-هنحلى الكنافة بالعسل الأبيض، أو بشربات الكنافة وندمجهم مع بعض
-بعد كدا هبدأ فى تذويب القهوة مع ماية باردة، وابدأ اضيفها علي البسكوت، والخطوة دي لازم الماية تكون باردة، عشان الماية السخنه هتدوب البسكوت.
- هنجيب طبق بايركس، ونبدأ نضيف البسكوت كطبقة من تحت، بعد ما نضيف عليه القهوة المذابه، وفى الخطوة دي ممكن نضيف أي نوع شيكولاته سبريد، أو صوص الفسدق.
-وبما إننا فى شهر رمضان، ممكن نضيف الكنافة علي أي وصفة، وبتعمل ميكس مع وصفات تانية، زي التيراميسو اللي بنحضره دلوقتي.
- هنضيف الكريمه علي البسكوت، وبعدين طبقة من الكنافة المحمصة.
-الخطوة قبل الأخيرة هضيف طبقة كريمه تانية، هندخلها التلاجة من ساعتين لـ ٣ ساعات عشان تبقى جاهزة.
للتزين :
هنضيف كاكو خام.
طرق مختلفة لتقديم الكنافة
وأكدت الشيف ياسمين طايع أن وصفة التيراميسو هي إيطالية فى الأساس، لكن مع إضافة الكنافة أصبحت شرقية غربية، وقالت: " الكنافة بقت بتتقدم حلو وحادق، زي لما نضيف لحمه مفرومة عليها أو فراخ.
