ما هي طرق التسوق الذكى فى رمضان؟ .. شيماء فوزى تُجيب
التسوق فى السوبر ماركت وبالتحديد فى شهر رمضان، يحتاج إلي ذكاء فى التعامل مع العروض والدعاية المقدمة من كل شركات المأكولات والمشروبات، ولأن شهر رمضان يفرض نفسه بميزانية مختلفة عن باقى شهور السنة، يجب على كل أسرة أن يختاروا المناسب لامكانياتهم المادية.
نصايح لشراء ذكى فى رمضان
وتحدثت دكتور شيماء فوزى، الكاتبة والباحثة فى مجال الإدارة، عن الطرق الصحيحة للتسوق فى شهر رمضان، وقالت فى تصريحات خاصة لـ آخر خبر TV: نصيحتي لكل أسرة أولهم أنهم يستغلوا العروض والتخفيضات، ويدوروا على الأماكن مناسبة لطلباتهم.
وتابعت : تانى نصيحة، لازم نبدأ بالحاجات الأساسية للبيت سواء أكل أو طلبات للبيت بشكل عام، وبلاش حاجات ملهاش لازمة، يعني مثلا نجيب النشويات واللحوم ونحاول نقسمها على الأسبوع، كمان الخضار نحاول نجيبه من السوق أوفر لأن المحفوظ أغلى، وبكدا أبقى اخترت الأماكن المناسبة والإحتياجات الأساسية للبيت.
شاهد بالفيديو ..
إدارة النفس فى رمضان
وأضافت : بعد كدا لو لاقينا أن الميزانية فيها مساحة لبنود زيادة، زى التريندات أو المعلبات ممكن نجيب، كمان لازم عند المُشترى الـ self controlling، ودى من العناصر المهمة جدآ فى إدارة الذات، ودا فى الدين على فكرة وهى إدارة النفس، يعني نسيطر على نفسنا ورغباتك وشهواتنا فى رمضان، صحيح عملية الشراء مختلفة فى الشهر الكريم، وفيها مؤثرات كتيرة والإعلانات والدعاية بتكون مغرية جداً لأصناف الأكل والشُرب والعروض، وتعتبر مناسبة كبيرة للمأكولات والمشروبات علشان كدا لازم نسيطر على نفسنا.
عزومة واحدة للمقربين كفاية
وكانت قد تحدثت نادين جاد خبيرة الإتيكيت، من قبل عن العزومات فى رمضان وقالت : العزومات المستمرة طول شهر رمضان مرهقة جدآ لميزانية أي بيت، والحل إننا نعمل عزومة واحدة متحضرة كويس، أو نعمل ديش بارتي يعني كل أسرة يشاركوا بطبق وبيتم تكوين سفرة كبيرة فيها كل الأصناف، فى بيت أحد الأشخاص بدون إرهاق ميزانية شخص واحد.
اختارى أطباق كبيرة فى العزومة
وتابعت نادين جاد : ولو مضطرة تعملي عزومة اختارى المقربين زى الأولاد والأحفاد، أما بالنسبة للأطباق فأفضل تختارى الأطباق المباركه، بمعنى الأطباق المصرية زي صواني الفتة، دي بتكون اقتصادية وبتشبع، أو تشكيلة محاشى، كمان صواني الرقاق مهم أوى على سفرة رمضان، كل دي أصناف مصرية بتعمل عزومة كبيرة وتملى العين وبتكفى من غير صرف كتير.
اشترى حلويات مرتين فى الأسبوع
وأضافت : بالنسبة بقى للمقارنات بلاش تقارنى نفسك بصحبتك أو قريبتك وجارتك، لأن كل واحد عنده ظروف، ودا بيسبب لك مشاكل كتير أولها نفسيتك وفقدانك لشعور الرضا والسعادة بالنعم اللي ربنا أنعم عليكي بيها. ونصيحتي الأخيرة إننا نبعد عن المبالغة فى شراء الحلويات، يعني ممكن تشتريهم مرتين فى الأسبوع والأفضل تعمليها فى البيت أوفر وأحسن.
