إظهار البراندات والأخطاء الخاصة بالموضة .. علا شلبى خبيرة الصورة والمظهر توضح
مفاهيم الموضة تغيرت على مر العصور باختلاف تطور الحياة والاستايل المتماشي مع كل عصر، لكن هناك بعض المعتقدات التى ترسخت في أذهان بعض النساء، ربما بسبب فهم خاطئ أو بسبب الانحراف الزائد وراء تريندات السوشيال ميديا.
معتقدات خاطئة عن الموضة تجنبيها
وعن أبرز الأخطاء التى تقع فيها الفتيات المتعلقة بالموضة، قالت علا شلبي خبيرة الصورة والمظهر، في تصريح خاص لـ آخر خبر TV: فى حاجات كتير بشوفها ممكن تكون معتقدات خاطئة عن الموضة، زي مثلاً أن اللوك كله يكون براندات باينة، مش لازم أصلا نلبس براند علشان نبان شيك، ولو هنتكلم عن قواعد الفاشون فممكن نلبس قطعة أو اتنين هما اللي براند واضح مش أكتر من كدا.
وتابعت : أما تانى معتقد عن الفاشون، هو إننا لازم نمشي ورا الموضة بدون تفكير هى لايقه عليا ولا لأ، والفكرة أصلاً اللي لازم نعرفها أن الموضة معمولة علشانا، وإحنا اللي نقرر إيه اللي لايق علينا وإيه اللي لأ، مينفعش نكون ضحية للموضة، لازم نبقى بوعى وعارفين بنختار إيه.
واستكملت : هنا مش بقصد إننا نختار لبس بعيد عن الموضة، لا اختارى طبعاً من الموضة لكن فى نفس الوقت اختارى اللي يناسبك.
اللبس الضيق مش دليل على الشياكة
وأضافت : بالنسبة لثالث معتقد خطأ عن الموضة قالت علا شلبى : بلاحظ إن فى بنات كتير بيلبسوا ضيق أوى من فوق ومن تحت، ومش بتحط فى اعتبارها شكل جسمها، كلنا عندنا حاجات فى جسمنا عايزين نداريها، فعمر ما كان اللبس الضيق دليل انك شيك بالعكس ساعات الوسع بيكون شياكه واناقة، إن أنا البس المناسب ليا دا قمة الإحترام والشياكة.
موضة البنطلونات فى 2026
وفى سياق متصل تحدثت خبيرة الصورة والمظهر علا شلبى عن خطوات اختيار البنطلون الصحيح قالت : خلينا الأول نعرف موضة البنطلونات الفترة دي، وظهر مؤخرا الـ Ballon Pants أو بنطلون علاء الدين زي ما بنقول عليه، هو بيكون منفوخ شوية وفيه استيك من الآخر، ظهر منه أنواع قماش كتير زي الجينز و بالبنطلون الكلاسيك القماش و الستان الخفيف طالع موضة جداً.
تابعت: ولسه مكمله معانا البنطلون الباجى، والـ wide leg pants والـ straight leg، أما الـ slim jeans بدأ يرجع تاني، مش الـ skinny لكن الـ straight slim.
اختارى شكل البنطلون المناسب لجسمك
أما عن اختيار شكل البنطلون بناء على طبيعة كل جسم، قالت : علشان أبسطها على البنات وتعرف تختار بكل بساطة، إلبسي البنطلون اللي يحسسك بالتوازن، يعني لو البنت عريضة من منطقة الفخد، يفضل تبعد عن البنطلونات اللي بتزود الحجم، زي الـ Ballon Pants، أو أى بنطلون فيه كُسر، هيزودوا شكل الجسم، ممكن تختار بنطلون flare أو straight هيكونوا أفضل بكتير.
