ريهام الهوارى : مراجعة النفس أهم خطة لتحقيق الأحلام فى 2026
تحقيق الأحلام والأهداف فى عام العام الجديد، من أهم الخطط التى يسعى إليها معظم الناس، والوصول لتنفيذ الخطط والأحلام مهمة ليست بسيطة لأن البدء فى الخطط بدون دراسة واضحة ومراجعة جيدة للعام السابق، تحقق نتائج وقتية.
فإذا كنتى تبحثين عن أحلام وأهداف قابلة للتحقيق فى 2026، لابد من مراجعه النفس، أو عمل كشف حساب ليسهل عليك التعرف عن الأخطاء والمشاكل السابقة ومحاولة حلها أو التعلم منها.
2026 سنة مختلفة تمامآ
وقالت ريهام الهوارى كوتش في الظهور العام وأخصائي علم النفس المؤسسي فى حوارها لـ آخر خبر TV: لازم نبقى عارفين إن سنة 2026 هتكون مختلفة تمامآ، هتكون فيها تغيرات كتير، سنة سريعة أكتر من السنين اللى فاتو، علشان كدا مراجعة النفس هي أهم حاجة قبل ما تدخلى السنة الجديدة.
شاهد الفيديو ..
غيرى من نفسك قبل شكلك
وأضافت : قبل ما تقررى إنتى عايزة إيه وهروح فين، وإيه اللي يتغير فى شكلك أو ستايلك أو حياتك بشكل عام، لازم تراجعى نفسك الأول، ولازم تعرفى إنتي كنتى فين وعايزة توصلى لإيه، واسألى نفسك إيه اللي تعبك فى سنة 2025، وإيه اللي ضايقك وإيه اللي استهلكك وإيه الحاجات اللي ريحتك، ولما مراجعة النفس تتعمل بدقة يبقى أى قرار هتاخديه هيتحقق فى 2026.
عايزين إيه من 2026
وتابعت : ويبقى السؤال المهم إحنا عايزين إيه من السنة الجديدة، عايزة أكون مين، بعد مراجعتك للسنة اللي فاتت قولى لنفسك فين صاحبتى اللي جوايا، لازم ترجعى لقوتك الداخلية، وترجعى متصالحة مع روحك ومشاعرك، وتعرفى إنك جميلة زي ما إنتى، وأوعى تسمعى للناس، إنتى قوية لنفسك مش برأى الناس فيكي.
الأنوثة والضغوط اليومية
واختتمت ريهام الهوارى حديثها قائلة : ناس كتير بتربط بين الأنوثة والضغوط اليومية، رغم أن الاثنين لا يتعارضوا مع بعض، الأنوثة حالة ذهنية والضغوط مش بتزودها ولا بتنقصها، لأنها موجودة طول الوقت، لكن عشان مفهومها مغلوط مش بنعرف ندور عليها جوانا صح.
