ريهام الهوارى : لغة جسدك تعادل 70% من مظهرك
لغة الجسد لها تأثير قوى على ظهورنا اليومى، سواء فى التجمعات العائلية أو فى الخروجات الرسمية، لذلك على كل امرأه التعرف على طرق التعامل الصحيحة بناء على لغة الجسد، وحلت ريهام الهوارى، كوتش في الظهور العام وأخصائي علم النفس المؤسسي، ضيفة على آخر خبر TV، وقالت في تصريح خاص : لغة الجسد بتعبر عن شخصيته وبتقول إنتى مين.
وأضافت : تفاصيل كتير عنك هتبان من حركتك ومشيتك وقاعدتك وطريقة كلامك، لأن 70% من ظهورك والانطباع الأول بيكونوا بناء على لغة جسدك.
شاهد الفيديو ..
واستكملت : يعنى طريقة الحركة والضحكة والقاعدة بتقول إنتى مين، مش إنتى لابسه إيه ولابساها إزاى، خدى بالك لغة الجسد دايماً هى اللي بتفضح يعنى لو إنتي شيك ولابسه على آخر موضة، وحاطة ميك أب وعاملة تسريحة شعر حلوة، لكن قلقانة، ومتوترة ومهزوزة، هيبان فى لغة جسدك ونظره عينيكي، وطريقة مشيتك وقعدتك، وإحنا مش عايزين دا يحصل.
رسائل غير واعية بتدى انطباع بعدم الأمان
وتابعت ريهام الهوارى : لازم كل واحدة تاخد بالها من الرسائل الغير واعية اللي بتدي انطباع بعدم الأمان ودى دايما بتقع فيها كل الستات، وأول ما بتدخل أى مكان تبص حواليها، مين موجود، مين قاعد، حركة العين الزايدة بتقول إنتى عايزة الناس تتفرج عليكى أو أنك متوترة والمكان مش مريح.
طريقة القعدة والماشية الصحيحة
وأضافت : لما تقعدى لازم تفردى ظهرك، أوعى تنكمشى حتي لو متعرفيش حد، خدى وقع مريح وحركة إيديك بانفتاح وكل عضلات وشك وجسمك مرتاحين، دايما بتدى إنطباع إنك مرتاحة وواثقة فى نفسك، وإنتى ماشية دايماً تبقى دقنك موازية للأرض، لما الرأس تتوازن فى مكانها دا بيحسسك بالاتزان، لا بتقعى ولا بتنحنى، ودا بيظبط الجسم كله، كمان لازم رجلك تسبق جسمك ، دا بيديكي طول وثقة.
طريقة القاعدة الصحيحة
واختتمت ريهام الهوارى حديثها، قائلة : وإنتى قاعدة لازم يكون ضهرك مفرود ورجلك لامسة الأرض، مش لازم تحطي رجل على رجل الأفضل إن رجلك تكون على جنبك بميل خفيف، دا هيظهرك بشكل أطول 10 سم، ومن هنا بيان الحضور والشياكة والثقة.
