غيري من جواكي .. ريهام الهوارى تضع خطة 2026
مراجعة النفس ووضع خطط حقيقية من أهم الأمور التى تشغلنا في العام الجديد، ومع بداية عام 2026، طرحنا بعض الأسئلة على ريهام الهوارى كوتش في الظهور العام وأخصائي علم النفس المؤسسي، التي حلت ضيفة على آخر خبر TV، لتساعد كل شخص فى اكتشاف نفسه ومراجعة حساباته.
خطوات تساعدك على دخول السنة الجديدة
وقالت ريهام الهوارى، في تصريح خاص : هناك بعض الخطوات على كل امرأة اتابعها قبل بداية العام الجديد، قولي لنفسك أنا هكون أحسن نسخة منى، وعلشان تحسى إنك أحسن نسخة، لازم تتصالحي مع نفسك وتلاقي الصديق والرفيق اللي جواكى، لازم تبقى صادقة وواعية إنتى مين، من هنا مافيش فى الدنيا حاجة هتخليكى مش مبسوطة لأنك مصاحبة نفسك.
عايزين إيه من 2026
واستكملت : ويبقى السؤال المهم إحنا عايزين إيه من السنة الجديدة، عايزة أكون مين، بعد مراجعتك للسنة اللي فاتت قولى لنفسك فين صاحبتى اللي جوايا، لازم ترجعى لقوتك الداخلية، وترجعى متصالحة مع روحك ومشاعرك، وتعرفى إنك جميلة زي ما إنتى، وأوعى تسمعى للناس، إنتى قوية لنفسك مش برأى الناس فيكي.
أرجع ثقتى فى نفسى إزاى
تابعت: أما سؤال نرجع ثقتنا فى نفسنا إزاي، ثقتك فى نفسك دخل عليها ضوضاء، هى موجودة طول ما إنتى ونفسك متصالحين، لكن النقد اللي بتسمعيه خدى منه اللي ينفعك مش اللي يغير مسارك.
يعني إيه ثقة بالنفس
اختتمت ريهام حديثها : أول ما بتقولى لنفسك أنا عارفة إيه اللي بيسعدنى ويريحني، وإيه اللي بيضايقني، الضوضاء الخارجية زى الانتقاد وآراء الناس هتاخدى منها اللي هيحسنك مش اللي هيخليكى تشكى في قدراتك وهنا تيجي الثقة، الثقة بالنفس يعني عارفه أنا عايزة أعمل إيه، وامتى وإزاي ويكون عندى الاستعداد التام لتحمل عواقبه.
