هل مسرح مصر راجع ؟ .. أشرف عبدالباقي يكشف لـ آخر خبر
حسم أشرف عبدالباقي الجدل حول إمكانية عودة تجربة مسرح مصر من جديد، مؤكدًا أن التجربة انتهت بعد سنوات من النجاح، وأنه انتقل إلى تقديم أفكار وتجارب مسرحية مختلفة.
إمكانية عودة مسرح مصر
وقال أشرف عبدالباقي، في لقاء خاص مع آخر خبر من كواليس مسرحيته الجديدة الساحل الشرير التي تعرض على مسرح بورتو مارينا في الساحل الشمالي : لا خلاص هي فكرة وخلصت، على مدى سبع سنين عملنا 150 مسرحية وخلاص.
وأضاف : في ناس كتير الحمد لله ابتدوا يقلدوا الفكرة، وإحنا خرجنا من الحتة دي ورحنا حتت تانية خالص، بديكورات مختلفة وممثلين مختلفين وروايات مختلفة، فبالتالي دي كانت تجربة وخلصناها وعملنا غيرها.
سولد أوت
وعبر أشرف عبدالباقي مؤخراً في تصريح خاص لـ آخر خبر عن سعادته بالإقبال الكبير على مسرحية الساحل الشرير، وقال : مبسوطين جدًا الحمد لله، قلنا نعمل حاجة في الساحل، إحنا يمكن بدأنا قبل الإجازات، والأسبوع اللي إحنا فيه ده هو بداية الإجازات، وبكرة تقريبًا آخر يوم في امتحانات الثانوية، فدايمًا بيتقاس المصيف بالثانوية، فبيبقى الإقبال الأكبر بعد ما بتخلص الثانوية، لكن الحمد لله إحنا من الأسبوع اللي فات فتحنا، والحمد لله كنا سولد أوت اليومين اللي فتحناهم.
مسرحية ترى البحر
وتحدث أشرف عبدالباقي عن طبيعة العرض واختلاف تقديمه في الساحل الشمالي، قائلًا : أول ما تخرج من باب المسرح إنت هتكون شايف البحر، ففكرة مسرحية ترى البحر دي كانت زي سلوجان، لكن كمان عملت رد فعل حلو.
وعن أبرز ما يميز مسرحية الساحل الشرير، قال : المختلف هنا إن أنا معايا مجموعة من الشباب الجداد، أنا طبعًا معايا أحمد عبدالوهاب، وكارولين عزمي، وكريم عفيفي، وإبرام، وكريم عفيفي وإبرام تحديدًا عندهم خبرة 150 مسرحية قبل كده، لكن هنا مسرحية مختلفة من فصلين، ومعايا 14 ولد وبنت أول مرة بيشتغلوا معايا.
أبطال مسرحية الساحل الشرير
مسرحية الساحل الشرير تدور أحداثها حول المفارقات الإجتماعية في الساحل الشمالي بشكل كوميدي، وهي من بطولة كل من أشرف عبد الباقي وأحمد عبد الوهاب وكارولين عزمي وكريم عفيفي وإبرام سمير، والمسرحية من تأليف كريم سامي وأحمد عبدالوهاب وإخراج أشرف عبدالباقي.
