أشرف عبدالباقي يكشف كواليس مسرحية الساحل الشرير
حرص آخر خبر على التواجد في كواليس مسرحية الساحل الشرير، التي يقدمها أشرف عبدالباقي بمشاركة عدد من النجوم والشباب على مسرح بورتو مارينا بالساحل الشمالي، كما التقي آخر خبر بالنجم أشرف عبدالباقي الذي عبر في تصريح خاص عن سعادته بالإقبال الكبير على المسرحية.
سولد أوت
وقال أشرف عبدالباقي : مبسوطين جدًا الحمد لله، قلنا نعمل حاجة في الساحل، إحنا يمكن بدأنا قبل الإجازات، والأسبوع اللي إحنا فيه ده هو بداية الإجازات، وبكرة تقريبًا آخر يوم في امتحانات الثانوية، فدايمًا بيتقاس المصيف بالثانوية، فبيبقى الإقبال الأكبر بعد ما بتخلص الثانوية، لكن الحمد لله إحنا من الأسبوع اللي فات فتحنا، والحمد لله كنا سولد أوت اليومين اللي فتحناهم.
مسرحية ترى البحر
وتحدث أشرف عبدالباقي عن طبيعة العرض واختلاف تقديمه في الساحل الشمالي، قائلًا : أول ما تخرج من باب المسرح إنت هتكون شايف البحر، ففكرة مسرحية ترى البحر دي كانت زي سلوجان، لكن كمان عملت رد فعل حلو.
وعن أبرز ما يميز مسرحية الساحل الشرير، قال : المختلف هنا إن أنا معايا مجموعة من الشباب الجداد، أنا طبعًا معايا أحمد عبدالوهاب، وكارولين عزمي، وكريم عفيفي، وإبرام، وكريم عفيفي وإبرام تحديدًا عندهم خبرة 150 مسرحية قبل كده، لكن هنا مسرحية مختلفة من فصلين، ومعايا 14 ولد وبنت أول مرة بيشتغلوا معايا.
وتابع : الـ 14 دول من إسكندرية ومن المعهد العالي للفنون المسرحية، الفرع بتاع إسكندرية، ومن مسرح آداب قسم مسرح، فهم ما شاء الله شاطرين جدًا، وعاملين هنا أدوار مميزة وواخدين فرصة كويسة، وأنا مبسوط بيهم جدًا، وبتمنى الناس اللي يشوفوهم كمان يشجعوهم بإذن الله.
تطور مبادرة سوكسية
كما كشف أشرف عبدالباقي عن التطور الذي شهدته مبادرة سوكسيه، موضحًا : التطور الحمد لله كان محسوب من الأول إن إحنا نبدأ بس نشجع الشباب اللي عندهم عروض مسرحية وعرضوها في مهرجانات أو عرضوها في جامعات، يجوا يعرضوا في مسرح الريحاني، وأنا كنت متبني المبادرة دي بدون ما يدفعوا مقابل، أنا بشجعهم، ومن خلال المسرحيات اللي بيقدموها بشوف منهم شباب هايلين.
وأضاف : يمكن بيبقى لي لو أنا ليا وجهة نظر في حد واقف قدامي تختلف تمامًا عن وجهة نظر جمهور كامل في صالة بيحكم هو بنفسه على الممثل، ده حكم أصدق بكتير من حكمي أنا، فلما بلاقي حاجة زي كده وبلاقي نجاح للممثل أو الممثلة اللي في العروض دي، بستعين بيهم في عرض آخر زي ما حصل هنا.
واختتم حديثه قائلًا : أنا الـ14 ولد وبنت اللي هم من إسكندرية شايفهم أوريدي في عروض قبل كده، مش بما إنهم من إسكندرية فييجوا خلاص، لأ، هم بالفعل عملوا عروض كتيرة قدموها في سوكسيه كمان، يعني في أكتر من حد فيهم قدم عروض من فرق الهواة في مسرح الريحاني في سوكسيه، وكنت شايفهم واخد أسمائهم لغاية ما جت فرصة، فقلت طيب ما يبقى في فرصة للشباب بتوع إسكندرية هنا، وده اللي حصل الحمد لله وحققوا نجاح كويس قوي.
أبطال مسرحية الساحل الشرير
مسرحية الساحل الشرير تدور أحداثها حول المفارقات الإجتماعية في الساحل الشمالي بشكل كوميدي، وهي من بطولة كل من أشرف عبد الباقي وأحمد عبد الوهاب وكارولين عزمي وكريم عفيفي وإبرام سمير، والمسرحية من تأليف كريم سامي وأحمد عبدالوهاب وإخراج أشرف عبدالباقي.
