كارولين عزمي تكشف لـ آخر خبر كواليس عودتها للمسرح بعد 9 سنوات
تحدثت كارولين عزمي عن كواليس عودتها إلى المسرح بعد غياب 9 سنوات، في لقاء خاص مع آخر خبر من كواليس مسرحية الساحل الشرير، التي تعرض بالساحل الشمالي، وكشفت تفاصيل شخصيتها في العرض، إلى جانب كواليس تعاونها مع أشرف عبدالباقي وأحمد عبدالوهاب وباقي فريق العمل.
دورها في المسرحية
وقالت كارولين عن دورها في المسرحية : بقدم دور نجلاء، بنت أستاذ أشرف عبدالباقي، وزوجة أحمد عبدالوهاب، وغيورة قوي على جوزها، طول الوقت بتتريق وبتغير وبتتنرفز وبتتخانق، وشخصية هايبر كده طول الوقت بتتحرك، بس هي المسرحية لذيذة قوي يعني.
عودتها إلى المسرح بعد غياب
وعن عودتها إلى المسرح بعد غياب 9 سنوات، قالت : غياب 9 سنين، فأنا بالنسبة لي أول ما جاتلي المسرحية، أنا من فترة كبيرة كنت عايزة أعمل مسرح لأنه كان واحشني، بدأته في معهد فنون مسرحية، فكنت حاسة إن أنا عايزة أرجعه، بس لما رجعته اتخضيت، اتبسطت أوي، ومخوفتش، بس كنت متحمسة، أكتر ما كنت خايفة.
وتحدثت كارولين عزمي عن كواليس العمل مع فريق المسرحية، قائلة : أنا حابة إن إحنا أي حد بييجي في دماغه حاجة بيقولها، حبيت أوي الكيميا اللي بيني وبين أحمد عبدالوهاب، وحبيت أوي شغلي مع أستاذ أشرف، مع إبرام، مع كريم، وكلنا كنا مبسوطين بصراحة مع بعض.
نصيحة أشرف عبدالباقي
وأضافت : طول الوقت أستاذ أشرف بيدينا نصايح، طول الوقت هو مش بيبخل خالص بالنصيحة، وعايز إن إحنا نطلع كل واحد أحسن ما عنده، فأنا حبيت أوي الشغل معاه.
واختتمت : كل البنات جيلي تقريبًا عملوا مسرح، وممكن سلمى أبو ضيف، لو قدمت مسرح هتكسر الدنيا.
أبطال مسرحية الساحل الشرير
مسرحية الساحل الشرير تدور أحداثها حول المفارقات الإجتماعية في الساحل الشمالي بشكل كوميدي، وهي من بطولة كل من أشرف عبد الباقي وأحمد عبد الوهاب وكارولين عزمي وكريم عفيفي وإبرام سمير، والمسرحية من تأليف كريم سامي وأحمد عبدالوهاب وإخراج أشرف عبدالباقي.
فيلم محمود التاني
من ناحية أخرى، تنتظر كارولين عزمي عرض فيلم محمود التاني بطولة كزبرة وأحمد غزي، والذي طرحت الشركة المنتجة بوستره والبرومو الرسمي، استعداداً لعرضه خلال موسم صيف 2026.
وكشف الإعلان التشويقي عن مفارقات كوميدية تجمع بين كزبرة وأحمد غزي، حيث يظهر الثنائي وهما يتبادلان الشخصيات ويعيشان حياتين مختلفتين تمامًا بين الأجواء الشعبية وعالم الرفاهية والأثرياء، في إطار مليء بالمواقف الساخرة والكوميديا.
