أحمد عبدالوهاب يكشف لـ آخر خبر كواليس مسرحية الساحل الشرير
حرص آخر خبر على التواجد في كواليس مسرحية الساحل الشرير، التي يقدمها أشرف عبدالباقي بمشاركة عدد من النجوم والشباب، على مسرح بورتو مارينا في الساحل الشمالي.
والتقى آخر خبر بـ أحمد عبدالوهاب، الذي تحدث عن تعاونه مع أشرف عبدالباقي، إلى جانب تجربته في تقديم المسرح بالساحل الشمالي وطقوسه الخاصة قبل صعوده على خشبة المسرح.
دوره في مسرحية الساحل الشرير
وقال أحمد عبدالوهاب في لقاء خاص مع آخر خبر إنه يظهر في المسرحية متزوج من كارولين عزمي، ويعتادان قضاء الصيف في شاليههما القديم بالساحل الطيب، قبل أن ينتقلا لأول مرة إلى شاليههما الجديد في الساحل الشرير، لتدور بينهما مجموعة من المواقف الكوميدية.
وعن تعاونه مع أشرف عبدالباقي، قال : أستاذ أشرف مش جديد عليا، اشتغلنا مع بعض كتير جدًا، كذا مسرحية من مسرح مصر وبعد مسرح مصر وفي السعودية، وأنا بحب أستاذ أشرف على المستوى الفني والشخصي جدًا، وكواليسه جميلة ومريحة، وبيبقى عايز يريح كل الناس ويبسط كل الناس، فمبسوط جدًا معاه.
طقوسه قبل المسرح
وتحدث أحمد عبدالوهاب عن طقوسه قبل صعوده على المسرح، قائلًا : أنا بحب أقعد في الأوضة، في أوضتي، أشغل أغاني شوية ومزيكا كويسة، وأفضل قاعد مركز كده خالص لحد ما المسرحية تبدأ.
وتابع : بحب من أول المسرحية أبقى موجود في الكواليس، مش على دخلتي بس، بحب أتفرج على المسرحية من الأول، بحب أشوف رد فعل الجمهور إيه لما الممثلين بيدخلوا اللي قبلي، بحب آخد الرهبة دي.
وعن تجربة تقديم المسرح في الساحل الشمالي، قال : طول الوقت كان في زمان مسرح في القاهرة ومسرح في إسكندرية، فدلوقتي لما يبقى في الساحل الشمالي طبعًا بقى ليه وضع تاني جديد، إننا نعمل مسرح في الساحل دي حاجة كويسة، لأن اللي بيسافر يصيف ويقضي إجازة، بيبقى عايز بالليل مسرحية كويسة، عايز حفلة جميلة أو مكان ينزل يسهر فيه، فأن يبقى موجود كل حاجة كده دي تجربة بصراحة أسعدتني جدًا.
واختتم أحمد عبدالوهاب حديثه، قائلًا : يا ريت يكون عندنا بدل المسرحية، خمسة وستة وسبعة زي زمان كده، كان أستاذ سمير غانم بيعرض مسرحية، ومحمد نجم بيعرض مسرحية، وعادل إمام بيعرض مسرحية، فيا ريت نرجع تاني المسرح يبقى زي السينما كده ويرجع أقوى من الأول.
أبطال مسرحية الساحل الشرير
مسرحية الساحل الشرير تدور أحداثها حول المفارقات الإجتماعية في الساحل الشمالي بشكل كوميدي، وهي من بطولة كل من أشرف عبد الباقي وأحمد عبد الوهاب وكارولين عزمي وكريم عفيفي وإبرام سمير، والمسرحية من تأليف كريم سامي وأحمد عبدالوهاب وإخراج أشرف عبدالباقي.
