نستنى ماما ولا نفطر؟ .. نادين جاد خبيرة الإتيكيت توضح
يقع الكثير من أفراد الأسرة فى خطأ كبير على سفرة شهر رمضان الكريم، وهو قيامهم بتناول الطعام فور رفع آذان المغرب، دون انتظار للأم التي تقف طوال اليوم فى المطبخ لإعداد الطعام، وبالتالي تشعر بالزعل من زوجها وأولادها، و بين مؤيد ومعارض لانتظار الأم حتى تجلس على السفرة، حتي بعد رفع الأذان ليبدأوا فى تناول الطعام.
لازم ننتظر ماما علي الفطار
وتحدثت خبيرة الإتيكيت نادين جاد، عن إتيكيت انتظار الأم علي السفرة فى شهر رمضان، وقالت فى حوار خاص لـ آخر خبر TV : إحنا لازم نستناها، أه المغرب بيأذن ولازم كلنا نفطر فى نفس الوقت، ولكن هي قامت بدور كبير جداً، واقفة طول اليوم فى المطبخ بتحضر الفطار، ممكن تكون لسه بتسخن حاجة أو بتجيب باقى الأطباق، فمهم أن إحنا نستناها.
شاهد بالفيديو ..
طيب نعمل إيه فى الوقت دا لحد ما ماما تيجي من المطبخ، ممكن نشرب عصير، أو ناكل تمر، أو نبدأ بالشوربة، لكن أكل لأ.
اتيكيت سفرة رمضان
تابعت : الإتكيت بيقول لازم نستنى ضيف الشرف، أو صاحب العزومة علي الفطار، دا احتراما ليه كمان منقومش من على ترابيزة السفرة أو الأكل غير لما نلاقى آخر واحد خلص أكل، لأننا لما بنقوم بنربك اللي لسه بياكل، ولما مش بنستنى ماما هي بتنزعل.
العيلة أولاً ثم الأصدقاء وزملاء العمل
وفى سياق متصل، تحدثت نادين جاد خبيرة الإتيكيت، عن ترتيب العزومات فى شهر رمضان، وقالت : بالنسبة للعزومات بتكون للأهل من الدرجة الأولى فى أول أسبوع من شهر رمضان الكريم، يعني الأب والأم والحماة والأخوات من الطرفين أو المقربين من الدرجة الأولى، وبالنسبة بقى لتاني وتالت أسبوع من رمضان، فبنحددهم للأصدقاء والجيران والزملاء فى العمل، وبرضو بيكون عن طريق مكالمة تليفون لكل شخص بنشوف اليوم المناسب معاه.
عزومة آخر أسبوع فى رمضان
تابعت : أما آخر أسبوع فى رمضان، فدا بيكون مخصص للعبادة بقى وتحضير نفسنا للعيد، ولو حبينا بتكون العزومات واخدة طابع الديش بارتي، أو الأكلات الخفيفة علشان أغلب الناس بيكونوا زهقوا من الأكل الدسم.
