تعرفى إزاى الألوان المناسبة ليكى؟ .. علا شلبى خبيرة الصورة والمظهر توضح
تقع الكثير من البنات فى حيرة بسبب عدم معرفتهم بالألوان المناسبة لطبيعة بشرتهم، ورغم معرفتهم الكاملة بألوان السيزون والترند إلا أنهم يشعرون بعد شراء قطع بألوان معينة أن اللون غير مريح.
شاهد بالفيديو ..
وبسؤال علا شلبى خبيرة الصورة والمظهر عن الطرق الصحيحة لمعرفة الألوان المناسبة لكل لون بشرة، قالت: الألوان دا عالم، فى حاجة بتتعمل اسمها professional color analysis، لو واحدة معندهاش الإمكانيات انها تعمل حاجة زي دي، أنا بقول أدى لنفسك فرصة شهر، كل يوم تبصى على شكل وشك فى المراية، اللون اللي وانتى لبساه بتحسى وشك مرتاح مش تعبان ولا مصفر ومش ظاهر الهالات السودا، كل دا من غير ميك أب، يبقى اللون دا لايق عليكي.
أعرف إزاي الألوان المناسبة لبشرتى
استكلمت : أما لو لون أول ما بتلبسيه بتحسى إنك لازم تحطي ميك أب كتير وشكل وشك تعبان وفى هالات سودا دا مش اللون بتاعك اعملى لنفسك ليست، واكتبى إيه اللون دا كان منور وشى ومناسب ليا، لأ اللون دا مكانش كويس.
أضافت : تانى حاجة ممكن تعرفك الألوان دي مناسبة ليكي، لما تلبسي لون وتاخد عليه مجاملات، زي شكلك حلو النهارده وفى فرق لازم نعرفه ما بين شكلك حلو يعنى شكلك كله منور، يبقي اللون اللي اخترتيه حلو عليكى، لكن لو اتقالك اللون دا حلو، فمش شرط يكون حلو عليكي إنتى.
ألوان موضة 2026
وبالنسبة للألوان الموضة فى 2026، قالت : هنلاحظ أن اللون البنى لسه مكمل موضة وبقاله سنتين، كمان اللون الزيتي واللون البرغندي بس اللى رايح شوية على موف أو بتنجانى أكتر، واللون الجراى موضة جداً، وعايزة أقول أنهم أعلنوا أن لون السنة فى 2026 هو الأبيض، ودى حاجة غريبة جدآ لأنهم عمرهم ما طلعوا اللون الأبيض موضة.
معتقدات خاطئة عن الموضة
وفى سياق متصل ردت علا شلبي خبيرة صورة ومظهر عن أبرز الأخطاء التى تقع فيها البنات متعلقة بالموضة وقالت: فى حاجات كتير بشوفها ممكن تكون أخطاء أو معتقدات عن الموضة، زي مثلا أن اللوك كله يكون براندات باينه، لا هو مش لازم ومش لازم أصلا نلبس براند عشان نبان شيك، ولو هنتكلم عن قواعد الفاشون فممكن نلبس قطعة أو اتنين هما اللي براند واضح مش أكتر من كدا، لكن من اللوك كله علامات لأ دا مش صح خالص.
أما تانى معتقد عن الفاشون، هو إننا لازم نمشي ورا الموضة بدون تفكير هى لايقه عليا ولا لأ، والفكرة أصلا اللي لازم نعرفها أن الموضة معمولة عشانا وإحنا اللي نقرر إيه اللي لايق علينا وإيه اللي لأ، مينفعش نكون ضحية للموضة لازم نبقى بوعى وعارفين بنختار إيه.
