إزاي تختاري البنطلون المناسب ليكي؟ .. علا شلبى خبيرة الصورة والمظهر تجيب
تجد العديد من الفتيات صعوبة فى اختيار بنطلون مناسب لشكل أجسامهن وطبيعة حياتهن اليومية، ويزداد الأمر صعوبة بظهور بعض الـ cuts موضة أو تريند، فإذا كنتى تبحثين عن طريقة بسيطة تساعدك على اختيار بنطلون مناسب وعملي يمكنك اتباع الخطوات التي تقدمها لكم علا شلبى، خبيرة الصورة والمظهر.
موضة بنطلونات 2026
وكشفت علا شلبى، فى حوار خاص لـ آخر خبر TV عن خطوات اختيار البنطلون المناسب لكل جسم، وقالت في تصريح خاص : خلينا الأول نعرف موضة البنطلونات الفترة دي، وظهر مؤخرا الـ Ballon Pants أو بنطلون علاء الدين، زي ما بنقول عليه، هو بيكون منفوخ شوية وفيه استيك من الآخر، وظهر منه أنواع قماش كتير زي الجينز و بالبنطلون الكلاسيك والستان الخفيف طالع موضة جدآ.
وتابعت : كمان لسه مكملة معانا موضة البنطلون الباجى، والـ wide leg pants والـ straight leg، أما الـ slim jeans بدأ يرجع تاني مش skinny لكن الـ straight slim .
اختيار شكل البنطلون بناء على طبيعة الجسم
وعن طريقة اختيار البنطلون المناسب لكل فتاة، قالت : بالنسبة للأجيال الجديدة، وعلشان أبسطها على البنات وكل واحدة تعرف تختار بكل بساطة، إلبسي البنطلون اللي يحسسك بالتوازن، يعني لو البنت عريضة من منطقة الفخد يفضل تبعد عن البنطلونات اللي بتزود الحجم زي الـ Ballon Pants ، أو أى بنطلون فيه كُسر، هيزودوا شكل الجسم، ممكن تختار بنطلون flare أو straight هيكونوا أفضل بكتير.
أضافت : والعكس صحيح لو إنتى رفيعة من نفس المنطقة اختارى ستايل بنطلون علاء الدين أو الباجي هيكونوا مناسبين جدآ.
البنطلون المناسب لو البنت طويلة أو قصيرة
وتابعت : فى سؤال دايما بيجيلى هو .. إيه البنطلون المناسب لو البنت طويلة أو قصيرة؟، لو البنت قصيرة مناسب ليها High waist pants بيديها إحساس بالطول، كمان الـ cropped pants أو البنطلونات عند الأنكل اختيار جيد، ولازم تبعد عن البنطلونات اللي فيها زيادة من تحت.
أما البنت الطويلة يفضل تبعد عن الـ High waist الأفضل ليها mid rise أو low rise.
