حماده هلال : مش بركز في أجري وأهم حاجة مستوى العمل اللي بقدمه
واصل حماده هلال حديثه مع آخر خبر TV، عن مسلسل المداح، وأجره في العمل، والمقارنة بين ميزانيات الأجزاء الـ 6 التي قدمها منذ عام 2020، وحتى الآن.
مبحبش أتكلم عن أجري
وقال حماده هلال في تصريح خاص : نتكلم للأمانة، والناس هتستغربني لو حسبناها بحسبة سنة 2020 الجزء الأول، أنا أجري أقل من الجزء الأول، وأنا أكتر واحد ما بحبش أتكلم على الأجور ولا الحاجات دي، إحنا ممكن نتنازل عن حاجات كتيرة لصالح الصورة، وإحنا مسلسلنا مكلف، وهي في الآخر ميزانية عايزين تاخدوا إيه ونشيل من إيه؟.
وتابع : ما فكرناش في المداح بالذات في حتة الأجر قد ما هو مسلسل أغلى مسلسل موجود كتكلفة، بس ده كله ما فيش مشكلة إحنا موافقين كصناع العمل، إحنا عايزين نسافر كذا، طب خدوا مننا، وما هو المنتج هو دي ميزانيته، ويُشكر إنه جايب ميزانية كبيرة برضه، بس إحنا غصب عنا طماعين عايزين نعمل حاجة كبيرة أوي، عايزين نعمل حاجة عالية، حاجة صورة كبيرة، أماكن كتير، لوكيشنات كتير، أحداث كتير، ما دي تكلفة، دي فلوس كتير، يوم التصوير الواحد بيكلف كام؟.
ميزانيات ضخمة
وأضاف : تخيل بقى إحنا بنصور في بلاد بتتحاسب بالدولار، وبلاد مش عارف إيه، وحتى لما بتسافر أسوان ولا بتسافر الأقصر دي تكلفتها عالية كأنك بره مصر، أوتيلات وإقامات، تكلفة كبيرة فما ركزتش خالص ومش في دماغي حتة مين أعلى أجر ومين بياخد أعلى فلوس ومين مش عارف مين.
قصة مسلسل المداح – أسطورة النهاية
بعد أن فقد قدراته الاستثنائية فداءً لمن يحب، يجد صابر المداح نفسه أمام أصعب تحدياته على الإطلاق، حين يواجه سميح، المارد الغامض من أعماق العالم السفلي. في رحلة محفوفة بالمخاطر لاستعادة قوته، يخوض صابر معركة وجودية ضد قوى الشر، محاولًا كبح جماح الظلام ومنع طوفان الخراب الذي يهدد الجميع. صراعات داخلية وخارجية، تحالفات غير متوقعة، وأحداث تتصاعد بشكل مشوق، تجعل هذا الجزء الأخير من المداح أكثر إثارة وتشويقًا من أي وقت مضى.
أبطال المداح
مسلسل المداح – أسطورة النهاية من تأليف أمين جمال، وإخراج أحمد سمير فرج، وبطولة حمادة هلال، ويشهد هذا الجزء عودة عدد من النجوم الذين شاركوا في أجزاء سابقة، أبرزهم فتحي عبدالوهاب، إلى جانب ظهور عدد من الفنانين كضيوف شرف، من بينهم أحمد السقا، يسرا اللوزي وحمزة العيلي، فضلاً عن مشاركة هبة مجدي، خالد سرحان، دنيا عبدالعزيز، حنان سليمان، وجمال عبدالناصر.
