الجزء الثاني من خامس حلقات أبيض وأسود .. ابنة هند رستم تتحدث عن طفولة والدتها القاسية
تكشف بسنت حسن رضا، ابنة الفنانة الراحلة هند رستم خلال حديثها مع برنامج أبيض وأسود، الذي يقدمه الناقد الفني محمد شوقي، ويعرض عبر منصات آخر خبر TV، عن جوانب خفية من حياة والدتها وطفولتها، كما تطرقت لموقف جمع والدتها بالمخرج ألفريد هيتشكوك، وسر اعتذارها عم فيلم المرأة المجهولة.
طفولة هند رستم
وقالت بسنت حسن رضا : طفولتها مكانتش حلوة، وكنت بشوف حزن في وشها لما بتفتكر طفولتها، لأن باباها اتجوز تاني وخلف منها ومراته كانت بتعملها بطريقة مش كويسة، ولما جدتها حسن إنها مش مبسوطة أخدتها معاها.
وتابعت : كل ده ساب أثر في نفسيتها، وخلاها حنينة قوي معانا، وكانت مخلياني مش محتاجة حاجة، لكن وقت الجد بنشوف منها وش تاني.
قصة والدتها مع المخرج ألفريد هتشكوك
وعن علاقة والدتها بالمخرج هيتشكوك قالت بسنت حسن رضا : مرة حد كان بيكلمها وقالها إن جالها طرد من أمريكا، وفتحته لقت فيه 5 كتب، مؤلفت كتب فيه عن كل ممثلات العالم، ومنهم كاتب عن هند رستم، وقايل كل واحد بيتكلم يقول إيه، وكان قايل إن المخرج ألفريد هتشكوك شافها في دور عنده وبعت لمصر وكان عايزها في عمل معاه، وكان عارض إنها ممكن تتكلم في الفيلم دوبلاج.
وتابعت : في ناقدة فنية خرجة وقالت عن الموقف ده إيه الهبل اللي بتقولوه ده، وطبعاً ده ضايق هند رستم لأنها بتطلعها كدابة، والكتب دي شاهدة على الموقف ده، وكانت صورتها على غلاف الكتاب وسط نجمات العالم.
فيلم المرأة المجهولة
وقالت بسنت حسن رضا : ماما صورت عدد من المشاهد في فيلم المراة المجهولة، وكان ليها صور كتيرة وهي بمكياج الشخصية، وسابت الفيلم بسبب تغيير المخرج حسن الإمام، والفيلم كان حلو جداً، ولما قدمته شادية مكانها متكلمتش أبداً ولا علقت عليها، لأن علاقتها بـ شادية وماجدة كانت حلوة جداً.
لقب ملكة الإغراء ومارلين مونرو الشرق
وكشفت بسنت حسن رضا سر غضب والدتها من لقب ملكة الإغراء : هي كانت بتضايق جداً من لقب ملكة الإغراء جداً، لأنه مش حلو، وهي مثلت حاجات كتيرة جداً بعيداً عن النوعية دي من الأدوار، وتابعت : أنا أفضل ليها لقب الجوكر لأنها كانت بتقدم كل حاجة الكوميديا ودراما طبعاً.
