ياسمين ثروت : بهتم بالتفاصيل ومش بحب حد يحكم عليا من شكلي
حلت ياسمين ثروت، رائدة الأعمال العربية، ضيفة على برنامج Mini Talks، الذي تقدمه الإعلامية هند رضا، على جميع منصات آخر خبر TV، وتحدثت خلال اللقاء عن سبب نجاحها، وحقيقة صورتها التي يراها الآخرين عنها.
بهتم بالتفاصيل
وقالت ياسمين ثروت : الصورة اللي الناس واخداها عني مش حقيقية، لأن مينفعش حد يحكم على أي حد من شكله، ودي حاجة بتضايقني، وتابعت : وأنا طول عمري بهتم بالفاشون، ولما أكون داخل أي ميتنج لازم أكون مهندمة، لكن في نفس الوقت أنا بنزل الموقع وبتعامل مع العمال، وبنزل أنضف بنفسي وبتعامل مع جميع الفئات، وده خلاني ملتزمة جداً في مواعيدي وقيمي ومبادئي بشوفها في شغلي وبيتي وعمري ما هتنازل عنها أبداً.
سر النجاح
وتحدثت ياسمين ثروت من قبل عن سر النجاح في حياتها، وقالت : العطاء أهم الحاجات اللي اتعلمتها من أمي، أما الكبرياء دي حاجة بشعة بحاول أهرب منه خالص، وقيمتي في أمانتي لو مش هعرف أعمل إيفنت دلوقتي بكون صريحة، وممكن حد يقول ليه لا ما أنتي هتكسبي منه، لكن أنا بكون أمينة وبقول ما ينفعش، لأني أنا ببص للعميل كعلاقة طويلة وممتدة، والولاء والصفة بيولد التكرار، وتابعت : خلال رحلتي القصيرة في ريادة الأعمال اكتشفت أن النجاح الحقيقي مش اللي بنحققه لنفسنا ولكنه الأثر اللي بنصنعه في حياه الأخرين، ريادة الأعمال مش مشروع أو استثمار فقط، ولكنها رسالة إنسانية.
الساحل وجهة عالمية
وقالت ياسمين ثروت من قبل عن الساحل كوجهة عالمية : من 3 سنين فقط من العمل في مدينه العلمين الجديدة، محدش يتخيل كل التقدم اللي بقت فيه دلوقتي، وتابعت : عملنا فاشن شو لـ مايكل سينكو من دبي مستوحى بالكامل من الفراعنة، وده من أغلى الإيفنتات على قلبي وكنت فخورة جداً إن حاجة زي دي تحصل في العلمين الجديدة، ومن زمان كنا شايفين اللي بيحصل ده دلوقتي هيحصل وأكتر وأكتر.
أجمل شاطئ البحر المتوسط
وأضافت : الساحل مفيش زيه، وهو من أجمل شواطئ البحر المتوسط، وأنا دايماً بشوف بلدي أحسن بلد وأحلى بلد، وطبعا لو اهتمينا بالخطوات اللي المطورين ماشيين فيها دلوقتي، وكل الفعاليات اللي بتحصل مصر هتكون في حتة تانية خالص، استثمارات وسياحة ووجهة عالمية، وأنا كل الناس دلوقتي بيكلموني من كل البلاد العربية وأمريكا والعالم كله عايزين ييجوا، لأن بالنسبة لهم الساحل ده مفيش زيه.
تفاصيل مبادرة يلا ساحل
تم الإعلان مؤخراً، عن إطلاق مبادرة يلا ساحل، التي تجمع كبرى شركات التطوير العقاري تحت مظلة موحدة، في خطوة تعكس تكامل وتوحيد جهود القطاع لتعزيز مكانة الساحل الشمالي كوجهة سياحية وترفيهية واستثمارية عالمية، وجاء الإعلان خلال مؤتمر صحفي استضافه G Hotel سيدي عبدالرحمن، بحضور نخبة من كبار المطورين العقاريين، ورجال الأعمال، وصناع القرار، إلى جانب عدد من الإعلاميين والشخصيات العامة.
