يسرا الليثي : الصراحة أساس نجاح العلاقات
تحدثت يسرا الليثي خلال لقائها مع آخر خبرTV عن أهمية الصراحة بين الشريكين في بداية العلاقة، وهل من الضروري مصارحة الطرف الآخر بما نحبه وتوقعاتنا منذ البداية لضمان نجاح العلاقة وتجنب الخلافات لاحقًا.
فترة الخطوبة
وقالت : هو المفروض إن أنا أقول، هو الصح إن أنا أقول، حتى لو متوقعة كل حاجة أنا متوقعاها من الشخص، عشان هو الصح إنه يرد يقول لأ أنا هقدرأقدم ده أو لأ، والعكس صحيح، يعني أنا بشوف إن ده الصح، ويمكن يكون هو ده فترة الخطوبة اللي بتحصل قبل الجواز، بتكون ده هدفها الأساسي إن إحنا نعرف بعض، نعرف بعض إحنا هنكمل مع بعض إزاي أحسن ما زي ما طول الرحلة أكتشفه ويكتشفني هنصطدم ببعض كتير جدًا.
أسباب نجاح العلاقات
وكانت قد تحدثت يسرا الليثي من قبل عن أسباب نجاح وفشل علاقات الحب أو الزواج، وقالت : فى أسباب كتير بتقول إن الجوازة دى مش ناجحة أو أن العلاقة دى مش هتكمل، زى أن مافيش بين الطرفين كلام، كمان النقد المستمر بين الطرفين بيلعب دور كبير فى انتهاء العلاقات، إلي جانب الإزدراء أو تقليل كل شخص من الطرف التانى، كل الحاجات دي علامات بتقول إن دى علاقة مش ناجحة، والعكس طبعاً، فى تصرفات بيقول إن العلاقة دى أو الجواز دا هيكمل وثابت.
مافيش كتاب للأمومة لازم نمشي عليه
كما تحدثت عن الفرق بين التربية زمان والآن، وقالت : لو هتكلم عن تجربتى الشخصية فى التربية كأم لـ 3 أولاد، ففي جزء كان صعب وجزء كان كويس، الصعب إنى خلفت بدرى أوى وكنت صغيرة قوى، وبقول لو كنت خلفت دلوقتي أو متأخر شوية كنت هبقى مختلفة أو فكريا أنضج. تربيتي كانت حب، دلع، اهتمام، عايزة كل حاجة تمشى صح زي ما الكتاب بيقول بالظبط، إنما لو كنت أكبر شوية كان هيبقى الوضع مختلف.
بداية التربية فطرة عن الأمهات
تابعت: أما بقى إيه اللي كان كويس فى تجربة تربيتي لأولادي وقتها، أن مكانش فى سوشيال ميديا، مكانش فى الضغط بتاع أنا بعمل إيه غلط وإيه صح، والتوتر والقلق اللي موجودين دلوقتي، كنت بتعامل بالفطرة و عايشين برا مصر و لوحدي تماما. أقدر أقول أن كانت فيها الحلو وفيها الصعب، واللي دايما بقوله أن رحلة الأمومة لكل أم مختلفة عن التانية ومافيش كتاب لازم نمشى عليه.
