يسرا الليثي : استمتعت بتربية أولادي قبل السوشيال ميديا
تواجه أغلب الأمهات صعوبات كثيرة أثناء رحلة تربيتها لأولادها، والكثير منهن يقعن فى حيرة ما بين تنفيذ طرق التربية القديمة، مثل تربية الأهل، وطرق التربية الحديثة التى انتشرت علي السوشيال ميديا، ورغم كثرة المحتوى الموجه للأمهات عن كيفية التربية الصحيحة وكيفية التصرف فى تساؤلات الأطفال، إلا أن التجربة تظل هي المفتاح الأول لكل أم لأن كل طفل لسه شخصية مختلفة عن غيره.
صعوبات تربية الأولاد فى سن صغير
وبسؤال يسرا الليثي، مدربة العلاقات وعلم النفس الإيجابي عن الفرق بين التربية زمان ودلوقتي قالت فى تصريحات خاصة لـ آخر خبر TV: لو هتكلم عن تجربتى الشخصية فى التربية كأم لـ٣ أولاد، ففى جزء كان صعب وجزء كان كويس، الصعب إنى خلفت بدرى أوى وكنت صغيرة أوى، وبقول لو كنت خلفت دلوقتي أو متأخر شوية كنت هبقى مختلفة أو فكريا انضج. تربيتي كانت حب، دلع، اهتمام، عايزة كل حاجة تمشى صح زي ما الكتاب بيقول بالظبط، إنما لو كنت أكبر شوية كان هيبقى الوضع مختلف.
شاهد بالفيديو ..
مافيش كتاب للأمومة لازم نمشي عليه
تابعت: أما بقى إيه اللي كان كويس فى تجربة تربيتي لأولادي وقتها، أن مكانش فى سوشيال ميديا، مكانش فى الضغط بتاع أنا بعمل إيه غلط وإيه صح، والتوتر والقلق اللي موجودين دلوقتي، كنت بتعامل بالفطرة و عايشين برا مصر و لوحدي تماما. أقدر أقول أن كانت فيها الحلو وفيها الصعب، واللي دايما بقوله أن رحلة الأمومة لكل أم مختلفة عن التانية ومافيش كتاب لازم نمشى عليه.
أسباب نجاح العلاقات
وكانت قد تحدثت يسرا الليثي من قبل عن أسباب نجاح وفشل علاقات الحب أو الزواج، وقالت : فى أسباب كتير بتقول إن الجوازة دى مش ناجحة أو أن العلاقة دى مش هتكمل، زى أن مافيش بين الطرفين كلام، كمان النقد المستمر بين الطرفين بيلعب دور كبير فى انتهاء العلاقات، إلي جانب الإزدراء أو تقليل كل شخص من الطرف التانى، كل الحاجات دي علامات بتقول إن دى علاقة مش ناجحة، والعكس طبعاً، فى تصرفات بيقول إن العلاقة دى أو الجواز دا هيكمل وثابت.
