كيف يربي ميدو أولاده؟ .. يسرا الليثى توضح
تعتقد الكثير من الأمهات أن تربية الأولاد، هى مهمتها الأساسية والأب دوره مقتصر على العمل وتلبية طلبات البيت والأولاد، وربما ترسخت هذه النظرية من تقسيم الأدوار فى البيت بناء على التربية القديمة، وبمجرد حدوث مشكلة أو خطأ من الأولاد، أول من تتعرض للنقد هى الأم، لكن مع التغيرات والتطور الكبير الذى نواجه كل يوم أصبح دور الأب لا يقل أهمية عن الأم خلال رحلة تربية الأولاد.
دور الأب مهم جداً فى تربية أولاده
وتحدثت يسرا الليثي، مدربة العلاقات وعلم النفس الإيجابي، عن فكرة اقتصار التربية على الأم فقط، وقالت في تصريح خاص لـ آخر خبر : دور الأب مهم جداً فى تربية الأولاد سواء بنت أو ولد، وبناء على تجربتى ميدو كان سنه صغير برضو، لكن دوره كان مهم جدا فى حياة الأولاد، لازم كل أب يبذل مجهود فى حياة أولاده.
شاهد بالفيديو ..
دور الأم الأساسى أول سنتين من عمر الطفل
وتابعت : خليني أوضح أن دور الأم الأساسي بيكون في أول سنتين من عمر الطفل، لأن احتياجات البيبي فى الوقت ده كلها مقتصرة على الأم، لكن بعد كده الأب لازم يكون موجود بشكل قوى فى حياة أولاده، سواء بنت أو ولد، يعني مثلا البنت أول صورة للرجل أو نموذج لرجل فى حياتها بتكون لمين؟ أكيد الأب، وأول نموذج للست فى حياة الولد بيكون الأم، كمان النموذج للعلاقة الأسرية المتكاملة فى نظر الأولاد بيكون فى وجود الأب والأم، علشان كده مهم جداً والأولاد صغيرين يشوفوا نموذج الأب والأم صح.
مافيش كتاب للأمومة لازم نمشي عليه
وعن الفرق بين التربية زمان ودلوقتي، قالت: لو هتكلم عن تجربتى الشخصية فى التربية كأم لـ 3 أولاد، في جزء كان صعب وجزء كان كويس، الصعب إنى خلفت بدرى قوى وكنت صغيرة، وبقول لو كنت خلفت دلوقتي أو متأخر شوية كنت هبقى مختلفة أو فكريا انضج، تربيتي كانت حب دلع، اهتمام، عايزة كل حاجة تمشى صح زي ما الكتاب بيقول بالظبط، إنما لو كنت أكبر شوية كان هيبقى الوضع مختلف.
بداية التربية فطرة عند الأمهات
واختتمت : أما بقى إيه اللي كان كويس فى تجربة تربيتي لأولادي وقتها، أن مكانش فى سوشيال ميديا، مكانش فيه الضغط بتاع أنا بعمل إيه غلط وإيه صح، والتوتر والقلق اللي موجودين دلوقتي، كنت بتعامل بالفطرة وعايشين برا مصر ولوحدي تماما، أقدر أقول أن كانت فيها الحلو وفيها الصعب، واللي دايما بقوله أن رحلة الأمومة لكل أم مختلفة عن التانية ومافيش كتاب لازم نمشى عليه.
