أسباب عدم استمرار العلاقات .. يسرا الليثي توضح
كشفت يسرا الليثي خلال لقائها مع آخر خبر TV عن أبرز الأخطاء التي تؤدي إلى عدم استمرار العلاقات، مؤكدة أن التوقعات العالية من الطرف الآخر تُعد من الأسباب الرئيسية لفشل أي علاقة.
وقالت : بندخل أي علاقة وإحنا حاطين توقعات عالية جدًا من الطرف التاني أو من العلاقة نفسها، وده بيعمل مشكلة، فالأفضل إن الواحد يقلل توقعاته من اللي قدامه، ويخلي تركيزه على هو هيقدم إيه، مش مستني ياخد إيه.
وأضافت : التواصل كمان مهم جدًا، لازم كل طرف يبقى واضح ويقول هو عايز إيه، لأن المشكلة إن ناس كتير بتدخل العلاقة وعندها توقعات كبيرة، وفي نفس الوقت مش بتوضح للطرف التاني هي مستنية منه إيه، فبيحصل تصادم وخلافات.
وتابعت : وده مش بس في العلاقات العاطفية، ده في كل العلاقات، سواء جواز أو صداقة أو حتى بين الأم وابنها،قبل ما ندخل أي علاقة لازم نكون فاهمين نفسنا الأول، نعرف إحنا بنحب إيه ومبنحبش إيه، وإيه اللي بيضايقنا، وكمان نعرف إحنا مستعدين نقدم إيه في العلاقة، قبل ما نستنى من الطرف التاني.
مفيش كتاب للأمومة لازم نمشي عليه
وكانت قد تحدثت يسرا الليثي من قبل، عن الفرق بين التربية زمان والآن، وقالت : لو هتكلم عن تجربتى الشخصية فى التربية كأم لـ 3 أولاد، ففي جزء كان صعب وجزء كان كويس، الصعب إنى خلفت بدرى أوى وكنت صغيرة قوى، وبقول لو كنت خلفت دلوقتي أو متأخر شوية كنت هبقى مختلفة أو فكريا أنضج. تربيتي كانت حب، دلع، اهتمام، عايزة كل حاجة تمشى صح زي ما الكتاب بيقول بالظبط، إنما لو كنت أكبر شوية كان هيبقى الوضع مختلف.
بداية التربية فطرة عن الأمهات
تابعت: أما بقى إيه اللي كان كويس فى تجربة تربيتي لأولادي وقتها، أن مكانش فى سوشيال ميديا، مكانش فى الضغط بتاع أنا بعمل إيه غلط وإيه صح، والتوتر والقلق اللي موجودين دلوقتي، كنت بتعامل بالفطرة و عايشين برا مصر و لوحدي تماما. أقدر أقول أن كانت فيها الحلو وفيها الصعب، واللي دايما بقوله أن رحلة الأمومة لكل أم مختلفة عن التانية ومافيش كتاب لازم نمشى عليه.
