إزاي تغيرى إحساس إنك مش كفاية ؟ .. يسرا الليثى مدربة العلاقات تٌجيب
تعانى الكثير من الفتيات والسيدات من بعض المفاهيم المرتبطة بكونها أنثى منذ الطفولة، ووصفها فى بعض المواقف إنها مش كفاية، وتكبر وهى مقتنعة إن أى مجهود أو إنجاز تقوم بتحقيقه غير مرضى للمقربين منها، لذلك تحاول الكثير منهن تقديم تضحيات أكثر من قدراتهن لمجهود إرضاء المحيطين والشعور بالرضا فى أعينهم.
التربية هي السبب شعور عدم الكفاية
وتحدثت يسرا الليثى مدربة العلاقات وعلم النفس الإيجابي لـ آخر خبر TV، عن هذا الشعور بالنسبة لبعض السيدات، وقالت فى تصريح خاص : للأسف شعور إني أنا مش كفاية بيبقى مربوط بحاجات كتير قوى، أساسها التربية، يعني الشخص دا متربي إزاي؟ فمثلا مش كفاية دي بتكون نتيجة إنك دايما بتعملى الحاجة ويتقالك لأ فى أحسن، أو لما تنجحي ويتقالك ليه مش جايبة الدرجات النهائية؟، فيكبر معانا الإحساس دا وبنحس إننا مهما عملنا مش كفاية.
شاهد بالفيديو ..
لازم يكون عندك وعى
وتابعت : امتى بقى يتغير الشعور دا لما يبقى عندك وعى، الوعى بالنسبة ليا هو مفتاح أي حاجة فى الحياة، يعني إيه الوعى إنى أكون عارفة أنا مريت بإيه فى صغرى، فلما أكبر وأنا متربية علي جملة أنا مش كفاية، لازم هنا توقفى الشعور دا، ويكون عندك وعى إنك كفاية واللي بتعمليه دا مجهودك وقدرتك واللى تقدرى عليه، وعلى فكرة إن الشخص يحس إنه دايماً ناقص دا شعور مؤذي نفسيا جداً، فأنا لازم أوصل لحتة أنا كفاية طالما قدرت أقدم أقصى ما عندى.
مافيش كتاب للأمومة لازم نمشي عليه
وكانت قد تحدثت يسرا الليثي من قبل، عن الفرق بين التربية زمان والآن، وقالت : لو هتكلم عن تجربتى الشخصية فى التربية كأم لـ 3 أولاد، ففي جزء كان صعب وجزء كان كويس، الصعب إنى خلفت بدرى أوى وكنت صغيرة قوى، وبقول لو كنت خلفت دلوقتي أو متأخر شوية كنت هبقى مختلفة أو فكريا أنضج. تربيتي كانت حب، دلع، اهتمام، عايزة كل حاجة تمشى صح زي ما الكتاب بيقول بالظبط، إنما لو كنت أكبر شوية كان هيبقى الوضع مختلف.
بداية التربية فطرة عن الأمهات
تابعت: أما بقى إيه اللي كان كويس فى تجربة تربيتي لأولادي وقتها، أن مكانش فى سوشيال ميديا، مكانش فى الضغط بتاع أنا بعمل إيه غلط وإيه صح، والتوتر والقلق اللي موجودين دلوقتي، كنت بتعامل بالفطرة و عايشين برا مصر و لوحدي تماما. أقدر أقول أن كانت فيها الحلو وفيها الصعب، واللي دايما بقوله أن رحلة الأمومة لكل أم مختلفة عن التانية ومافيش كتاب لازم نمشى عليه.
