إزاى تكونى رقم واحد فى حياة نفسك؟ .. يسرا الليثي تجيب
هناك بعض المعتقدات الخاطئة التى تتوارثها الفتيات والسيدات، ترتبط بمدى قدرة كل سيدة على التضحية، وكأن هناك ارتباط قوى بين مدى قدرة كل منهن على التضحية واستحقاقهن للقب أم، حتى أن الكثير من الأمهات افتقدن لمشاعر الاهتمام بالذات وتلخصت حياتهن فى كيفية إرضاء وإسعاد الآخرين، وبمجرد انتهاء رحلة التربية وانشغال كل شخص فى أسرتها بحياته، تكتشف إنها لم تحقق أى شئ من أجل سعادتها الشخصية.
إنتى رقم واحد فى حياتك
وتحدثت يسرا الليثي، مدربة العلاقات وعلم النفس الإيجابي عن المعتقدات المرتبطة بتضحية الستات، ووضع نفسها فى المرتبة الأخيرة من الاهتمامات، وقالت فى تصريحات خاصة لـ آخر خبر TV : النهارده أنا مينفعش أدى والكوباية فاضية، لازم تكون مليانة، يعني في البداية لازم يكون عندك القدرة إنك تلبي احتياجاتك وراضية عن نفسك ومبسوطة، علشان تقدرى تسعدى اللي حواليكي أو تقدرى تضحي.
شاهد الفيديو ..
خدى بالك من نفسك ومن صحتك
وتابعت : المفهوم نفسه لازم يتغير، يعنى لازم تكونى رقم واحد في حياتك علشان تقدرى تساعدى المحيطين بيكي عائلتك وأسرتك، وخليني أقول مثال بسيط، لو أنا أم ومش باخد بالى من صحتى خالص وسايبة صحتي آخر حاجة، المهم الأولاد تكون صحتهم كويسة وبيروحوا التمارين، هيحصل إيه؟ أكيد فى وقت ما هقع، طيب هكمل إزاى؟ علشان كده لازم آخد بالى من نفسى وصحتى، وأعرف إيه اللي يبسطنى ويسعدني علشان أعرف أكمل.
أسباب نجاح العلاقات
وكانت قد تحدثت يسرا الليثي من قبل عن أسباب نجاح وفشل علاقات الحب أو الزواج، وقالت : فى أسباب كتير بتقول إن الجوازة دى مش ناجحة أو أن العلاقة دى مش هتكمل، زى أن مافيش بين الطرفين كلام، كمان النقد المستمر بين الطرفين بيلعب دور كبير فى انتهاء العلاقات، إلي جانب الإزدراء أو تقليل كل شخص من الطرف التانى، كل الحاجات دي علامات بتقول إن دى علاقة مش ناجحة، والعكس طبعاً، فى تصرفات بيقول إن العلاقة دى أو الجواز دا هيكمل وثابت.
