مي القاضي : التغيير قرار ذاتي وكل واحد بيشيل شيلته
تواصل الاخصائية النفسية مي القاضي، حديثها في ثاني حلقات برنامج Mini Talks، الذي تقدمه الإعلامية هند رضا، على آخر خبر TV، وتحدثت حول كيف يغير الإنسان من نفسه، وحدوده مع الآخرين، والعديد من الأمور الأخرى.
قرار التغيير
وقالت هند رضا في بداية اللقاء : في ناس بتقرر تقف مع نفسها، وتقول أنا غلط وعايز أبقى أحسن، وفي ناس تانية بتكابر وبيقولوا أنا تمام، رغم أن تصرفاتهم بتكون مش مظبوطة، وكل اللي حواليهم بينصحوهم يتغيروا، اللي قرر يتغير بيبدأ سكته، إنما اللي تايه ده يعمل ايه؟.
وأجابت مي القاضي رداً على هذا التساؤل، قائلة : إن الله لا يغير ما بقوم حتى يغيروا ما بأنفسهم، أنا عليا النصيحة، لكن زي ما بيقولوا مش هصليلك، محدش بيقدر يغير حد غير لما يكون هو عايز يتغير.
شاهد بالفيديو ..
طريقة النصيحة
وتابعت : اللي حواليه عليهم إنهم يشاوروا ليه على المشكلة، ويقولوا له أنت محتاج تتغير لأن الوضع ده مش مناسب ليك، لو قال أنا مش مضايق ومرتاح كده، نبدأ نغير معاه الطريقة، ومجرب كذا مرة لحد ما نقتنع إن مفيش فايدة، وكل واحد في النهاية بيشيل شيلته.
وأضافت : النقطة اللي عايزين نأكد عليها، ابذل مجهود في تغيير نفسك، ومتتعبش نفسك في تغيير الآخرين.
إزاي تعرفي قيمة نفسك؟
وتحدثت مي القاضي من قبل عن قيمة النفس، وقالت في تصريح خاص : في البداية هحكي ليكم القصة بتاعة شخص كان بياع ألماظ، والشخص ده مبيظهرش كتير، البلد كلها محلات ألماظ، بس هو بييجي كل فترة، يدخل بس على بيت الملك على طول، وتابعت : ليه بيدخل وبيبيع للملك بس؟، لأن الحاجات اللي معاه حاجات نادرة جداً وحاجات كويسة جداً.
هل هي فعلاً مختلفة عن أي حاجة تانية في المحلات التانية؟ لا، ولكن هو عارف قيمته ومثمن نفسه، وبيتعامل على إنه: أنا عارف كويس أوي قيمة الحاجات اللي معايا، فبيتفتح له كل أبواب القصر، وبيتفتح له أي حاجة، بيدخل ومش موجود ومش متاح طول الوقت لأي حد.
وأضافت مي : الناس بتحترم البياع ده لأنه عارف قيمة حاجته، بالتالي الناس بتعمل له قيمة، وبالتالي الناس بتفتح له أي باب، ومحدش يقدر ييجي عليه ويقول له : طب ما حاجتك زي اللي عندي، محدش يقدر ليه؟، لأن هو عارف قيمته وهو اللي عمل لنفسه الشخصية دي، وهي دي النقطة، لكن باقي المحلات عادية، يا إما هتبيع يا إما مش هتبيع، لكن هو عارف كويس قوي إنه لما هيدخل عند الملك هيبيع، فهي النقطة كلها أنت متبقاش عامل لنفسك إن أنا عادي، أنت مش عادي.
