مي القاضي تتحدث عن الفرق بين السلام النفسي وقيمة النفس
تواصل الاخصائية النفسية مي القاضي، حديثها في ثاني حلقات برنامج Mini Talks، الذي تقدمه الإعلامية هند رضا، على آخر خبر TV، وكشفت الفرق بين السلام النفسي وقيمة النفس، والثقة بالنفس والحب المشروط.
السلام النفسي وقيمة النفس
وقالت مي القاضي في تصريح خاص : السلام النفسي وقيمة النفس، ممكن يعتبروا لبعض زي وجهين لعملة واحدة، القيمة أو إحساسي بقيمتي بيشوه أو بيحسن سلامي الداخلي، يعني إيه؟ يعني أنا حاسة إن أنا أصلاً ماليش لازمة وماليش قيمة، الناس كلها أحسن مني، أنا ماعملتش حاجة في حياتي وماليش دور في الدنيا، فهل أنا كدة ممكن أقدر أحس بالسلام النفسي؟ استحالة.
الثقة بالنفس
وتابعت : النقطة كلها إن ده بيأثر على ده، لكن لو أنا عندي ثقة في نفسي وفاهماها وعارفاها ومصاحباها وعلاقتي بنفسي كويسة وعارفة قيمي كويس جداً وعارفة حدودي والواجبات بتاعتي وحقوقي، وقتها ده حيكون خطوة حلوة قوي في سلامي النفسي، ومش بقول إن ده كله السلام النفسي، ولكن خطوة كبيرة تجاه سلامي النفسي، وده بيوصل لده، عارفة الدور الأول والتاني.
شاهد بالفيديو ..
خطوات الوصول للسلام النفسي
وأضافت مي : السلام النفسي هو العمارة كلها، في بقى خطوات وأدوار هما دول اللي بيوصلونا للسلام النفسي، فمن ضمنهم إن أنا أعرف قيمتي، لأن مشكلة كبيرة إن أنا مابقاش عارف قيمتي، وإحنا اتولدنا كلنا ماعندناش شك إن ربنا بيحبنا ولا لأ، صح؟
وأكملت : بدايةً بنتربى على إيه؟، لو مكملتش أكلك ربنا حيزعل منك، لو ضايقت مامتك ربنا حيعاقبك، لو زعلت إخواتك أو صحابك ربنا حيعمل فيك كذا، شفت اللي حصلك ده؟ بسبب إن ربنا زعلان منك، فبدأ حب ربنا لينا يبقى مشروط من جوانا، وبدأ يبقى عندي شك إن أنا ربنا بيزعل مني أو ربنا مابيحبنيش.
الحب المشروط
وتابعت : نيجي بعدها مابيبقاش عندنا شك بابا وماما بيحبوني ولا لأ، لغاية لما نفس الكلام : أنا زعلان منك، لو مابقتش كذا، فبرضو بدأ الحب يبقى مشروط، وبدأت التربية تخلي إن قيمتي تقل لأن بنت خالتي أحسن مني، لأن لازم أرضي أخويا علشان أبقى كويس ومرضي عليا، عشان إن أنا لازم أتعامل مع بابا وماما بالشكل الفلاني، لازم أسلم على عمو وعلى طنط وأنا مش عايز بس لازم علشان الناس تبقى فرحانة بيا ويبقى ليا قيمة ولازمة في وسط الناس، لازم أبقى شمعة تحترق من أجل الآخرين علشان يحبوني ويفضلوا حواليا ومابقاش لوحدي.
