إزاي تعرفي قيمة نفسك؟ .. مي القاضي توضح
تواصل الاخصائية النفسية مي القاضي، حديثها في ثاني حلقات برنامج Mini Talks، الذي تقدمه الإعلامية هند رضا، على آخر خبر TV، ووجهت نصيحة لكل سيدة خلال حديثها حول كيف تعرف كل منهن قيمة نفسها، بعبيداً عن التواضع الشديد والكِبر والعديد من الأمور الأخرى.
إزاي تعرفي قيمة نفسك؟
وقالت مي القاضي في تصريح خاص : في البداية هحكي ليكم القصة بتاعة شخص كان بياع ألماظ، والشخص ده مبيظهرش كتير، البلد كلها محلات ألماظ، بس هو بييجي كل فترة، يدخل بس على بيت الملك على طول، وتابعت : ليه بيدخل وبيبيع للملك بس؟، لأن الحاجات اللي معاه حاجات نادرة جداً وحاجات كويسة جداً.
هل هي فعلاً مختلفة عن أي حاجة تانية في المحلات التانية؟ لا، ولكن هو عارف قيمته ومثمن نفسه، وبيتعامل على إنه: أنا عارف كويس أوي قيمة الحاجات اللي معايا، فبيتفتح له كل أبواب القصر، وبيتفتح له أي حاجة، بيدخل ومش موجود ومش متاح طول الوقت لأي حد.
شاهد بالفيديو ..
أنت مش عادي
وأضافت مي : الناس بتحترم البياع ده لأنه عارف قيمة حاجته، بالتالي الناس بتعمل له قيمة، وبالتالي الناس بتفتح له أي باب، ومحدش يقدر ييجي عليه ويقول له : طب ما حاجتك زي اللي عندي، محدش يقدر ليه؟، لأن هو عارف قيمته وهو اللي عمل لنفسه الشخصية دي، وهي دي النقطة، لكن باقي المحلات عادية، يا إما هتبيع يا إما مش هتبيع، لكن هو عارف كويس قوي إنه لما هيدخل عند الملك هيبيع، فهي النقطة كلها أنت متبقاش عامل لنفسك إن أنا عادي، أنت مش عادي.
الفرق بين التواضع والكِبر
وقالت هند رضا : ده مايعتبرش كِبر؟ .. إزاي نوازن بين الحالتين لا هو تواضع قوي ولا كِبر قوي؟، وأجابت مي القاضي، قائلة : هي شعراية بين الاتنين، مش بقول إن أنت مفيش منك، عارفة الدعاء اللي بيقول : اللهم اجعلني كبيراً في عيون الخلق، صغيراً في عين نفسي .. هي دي النقطة، إن أنت ميداسش عليك رايح جاي، حاجات بسيطة لازم ناخد بالنا منها علشان نحقق المعادلة الصعبة دي.
