ليه دايماً بنقول معنديش حاجة ألبسها؟ .. علا شلبى خبيرة الصورة والمظهر تجيب
أنا معنديش لبس فى الدولاب، من أشهر الجمل التى تُرددها أغلب البنات مع كل موسم أو أحياناً فى كل مناسبة أو خروجة، ولأن اختيار اللبس وتوفير القطع المناسبة لشخصيتها من أولويات معظم البنات.
خطوات قبل ما تقررى تشترى لبس جديد
وعلقت علا شلبي، خبيرة الصورة والمظهر، على هذا الأمر، وقالت فى حديث خاص لـ آخر خبر TV : لازم ترتبى دولابك بانتظام، مش كل سيزون، لأ فى وسط كل موسم مرتين أو تلاتة، لأن أنا لما بلبس وأرجع الهدوم، بلاقى إيدي بدأت تروح على الحاجة الأقرب وبنسى الحاجات اللى مستخبية.
وتابعت : في اللحظة دي بعتقد إنى فعلاً معنديش لبس غير اللي بطلعة كل مرة، مع إن فى حاجات مستخبية وإنتى مش شيفاها، فكل شوية لازم تغيري وتوضبى دولابك واختارى أوت فيت جديد وقطع مختلفة، بحيث إنى أشوف كل الحاجات اللى عندى.
شاهد الفيديو ..
امتى تشترى لبس جديد
وأضافت : امتى أقرر إنى فعلا معنديش لبس، لما أنفذ فكرة الترتيب والتغيير المستمر، واكتشف فعلا إنى محتاجه نواقص كتير أو أن جسمك أتعرض لتغيير بسبب حمل والولادة أو خسيتى أوى فجسمك اتغير، أو أنك اشتغلي شغل جديد فهنا إنتى فعلا محتاجة لبس جديد، كمان فى فترات مهمة لازم البنت تجيب لبس جديد زي بداية دخول الجامعة أو التخرج، هنا إنتى بتحتاجى قطع جديدة مناسبة للمرحلة الجديدة اللي إنتى فيها.
ترتيب الدولاب
وتابعت علا : ترتيب الدولاب يختلف من شخص لآخر، ممكن ناس تفضل ترتب دولابها بالـ أوت فيت، ودول عادة الناس اللي بتشتغل، بيصحوا معندهمش وقت وعايزين يسحبوا طقم كامل يلبسوه.
ترتيب الدولاب حسب الألوان
وفى شخصيات تانية بيفضلوا ترتيب الدولاب بالالوان، يعني القطع اللي لونها أبيض مع بعض والأسود مع بعض، دا بيساعدهم يشوفوا حاجتهم أحسن.
ترتيب الدولاب حسب القطعة
والنوع الأخير بيحبوا يرتبوا بالقطعة، يعني الشيميزات مع بعض والبنطلونات فى مجموعة منفصلة، عشان كدا بنقول مفيش قاعدة لترتيب الدولاب، أهم حاجة تكون طريقة مناسبة لينا ومريحة بحسها لما أفتح دولابي أعرف أختار هدومى بسرعة.
