اختار الشنطة المناسبة ليا إزاي؟ .. علا شلبى توضح
هناك بعض التفاصيل التى تؤثر فى شكل مظهرك العام، فكثيرا ما تحرص البنات على اتباع الموضة سواء فى الاستايل أو درجات الألوان، لكن تشعر أن اللوك الخاص بمظهرها العام ينقصه شئ غير واضح بالنسبة لها.
شاهد بالفيديو ..
ومن أهم تفاصيل اللوك اليومى معرفة شكل وحجم الشنطة المناسبة لطبيعة جسمك، ففى عالم الموضة لم يقتصر الأمر على اختيار الترند من القطع فقط، بل معرفة فن اختيار حقيقتك اليومية بوعى ودقة.
شكل جسمك و حجم شنطتك
وبسؤال علا شلبى خبيرة الصورة والمظهر، عن كيفية اختيار الشنطة المناسبة لطبيعة الجسم واللايف ستايل قالت فى تصريحات خاصة لـ آخر خبرTV: بالنسبة لحجم الجسم، فى حاجه اسمها scale إحنا برضو فى عالم الاستايلنج بنعتمد عليه، مالهاش علاقة بالشخص دا تخين أو رفيع، ليه علاقة أكتر بحجم عضم البنى آدم.
فواحدة مثلا ممكن تكون حجمها صغير بس تفاصيل جسمها سواء ايديها أو عضمها مش رفيعه قوى، والعكس واحدة ممكن تكون مليانة بس تفاصيلها صغيرة.
خطوات بسيطة لمعرفة ستايل الشنطة المناسب
استكملت : طيب كل واحدة لازم تعرف الـ scale بتاعها إزاى، بطريقة بسيطة لو مسكتى ايدك ولفيتي صوابعك على رسغ اليد لو لمسوا بعض يبقى إنتى عادى regular، يليق عليكي الاكسسوارات والشنط متوسطة الحجم. أما لو صوابعك لمشوار بعض ولفوا، يبقي إنتى الـ scale، بتاعك صغير وبالتالي بيليق عليكي كان حلجه صغيرة ورفيعة، شنط وإكسسوارات وخواتم كلهم صغيرين فى الحجم. لكن لو الصوابع موصلوش لبعض يبقي الـ scale بتاعك كبير، فيكون اتجاهك للشنط الكبيرة والإكسسوارات، أى حاجه فيها رسومات واضحة.
البنات القصيرة وحجم الشنطة
أضافت علا شلبى: البنات القصيرة يفضل ليهم الشنط المتوسطة والصغيرة، أما البنات الطويلة فالأحسن ليهم شنطة متوسطة أو كبيرة عشان يكون شكلها متناسق مع حجم جسمها.
حجم الشنطة فى الشغل أو الدراسة
أما بالنسبة للشغل والدراسة فأكيد بنحتاج شنط كبيرة عشان نحط فيها الكتب واللاب توب فمش هيكون مناسب شنطة صغيرة ودا عشان طبيعة الفترة دي، كمان بالنسبة لحجم الشنطة فى الشغل فحسب طبيعة شغلك لو مثلا كل يوم محتاجة لاب توب، فإنتى كدا لازم يكون عندك شنطة كبيرة، لكن لو شغلك مش طالب منك تفاصيل كتير عادى البسي المناسب ليكي و لاحتياجاتك وأهم حاجة تكون عملية.
