أشرف عبدالباقي : بقالي 40 سنة بقدم مسرح
كشف أشرف عبدالباقي عن سر حبه الكبير وارتباطه بالمسرح على مدار 40 عامًا، مؤكدًا أن رحلته مع المسرح بدأت منذ عام 1986، وتواصلت من خلال العديد من التجارب والعروض المختلفة.
40 سنة مسرح
وقال أشرف عبدالباقي، في لقاء خاص مع آخر خبر TV من كواليس مسرحيته الساحل الشرير في الساحل الشمالي : بالصدفة السنة دي تحديدًا بقالي 40 سنة مسرح، يعني من سنة 1986، وأول مسرحية قدمتها هي خشب الورد، وكانت مع الأساتذة الكبار محمود عبدالعزيز وعبدالمنعم مدبولي ومجموعة كبيرة جدًا من الفنانين.
وأضاف : من أول المسرح المدرسي ومسرح الجامعة وفرق الهواة لغاية الاحتراف في 1986، ومن 1986 لغاية دلوقتي أنا طول الوقت بعمل مسرح، حتى لو المسرح وقف شوية.
تياترو ومسرح مصر
وتابع : عملت محاولة تانية إني أرجع بـ تياترو مصر ومسرح مصر، وبعد تياترو مصر ومسرح مصر عملت حاجة اسمها اللوكاندة، وعملت جريمة في المعادي، ودي مسرحية أخدت لها كوبي رايت من لندن وعملتها، وعملت حوالي 12 عرض مسرحي كبير.
وعن الانتقادات التي تعرضت لها تجربة مسرح مصر، قال أشرف عبدالباقي : يمكن كان بعض الناس إذا كانوا بيهاجموا مسرح مصر على إنه مسرحيات صغيرة وغير اللي هما بيعتادوا عليها، أنا عملت 12 مسرحية من اللي هما بيعتادوا عليها وهما لسه بيهاجموا مسرح مصر.
واختتم : مسرح مصر متوقف بقاله 8 سنين، وخلال الـ8 سنين دي أنا عملت 12 عرض مسرحي زي المسرحية دي، مسرحية كبيرة، فصلين، فيها مجموعة من الفنانين وكمان مجموعة من الشباب.
سولد أوت
وعبر أشرف عبدالباقي مؤخراً في تصريح خاص لـ آخر خبر عن سعادته بالإقبال الكبير على مسرحية الساحل الشرير، وقال : مبسوطين جدًا الحمد لله، قلنا نعمل حاجة في الساحل، إحنا يمكن بدأنا قبل الإجازات، والأسبوع اللي إحنا فيه ده هو بداية الإجازات، وبكرة تقريبًا آخر يوم في امتحانات الثانوية، فدايمًا بيتقاس المصيف بالثانوية، فبيبقى الإقبال الأكبر بعد ما بتخلص الثانوية، لكن الحمد لله إحنا من الأسبوع اللي فات فتحنا، والحمد لله كنا سولد أوت اليومين اللي فتحناهم.
مسرحية ترى البحر
وتحدث أشرف عبدالباقي عن طبيعة العرض واختلاف تقديمه في الساحل الشمالي، قائلًا : أول ما تخرج من باب المسرح إنت هتكون شايف البحر، ففكرة مسرحية ترى البحر دي كانت زي سلوجان، لكن كمان عملت رد فعل حلو.
وعن أبرز ما يميز مسرحية الساحل الشرير، قال : المختلف هنا إن أنا معايا مجموعة من الشباب الجداد، أنا طبعًا معايا أحمد عبدالوهاب، وكارولين عزمي، وكريم عفيفي، وإبرام، وكريم عفيفي وإبرام تحديدًا عندهم خبرة 150 مسرحية قبل كده، لكن هنا مسرحية مختلفة من فصلين، ومعايا 14 ولد وبنت أول مرة بيشتغلوا معايا.
