4 طرق هتفرق فى شكلك لو مُحجبة .. علا شلبى خبيرة الصورة والمظهر توضح
تقع الكثير من الفتيات فى حيرة اختيار ستايل الحجاب المناسب لجسمها وشكلها، ويظل سؤال : إيه الموضة المناسبة للحجاب؟ الأكثر تردداً فى أذهان الكثير منهن، فهناك بعض الأخطاء التى تقع فيها المحجبات بشكل عام التى تضعف من مظهرها العام.
الحجاب ستايل فى حد ذاته
وكشفت علا شلبى خبيرة الصورة والمظهر، عن الأخطاء التى تقع فيها المحجبات، وقالت فى حديث خاص مع آخر خبر TV : بالنسبة للمحجبات، أول حاجة أنا بقولها إنى بشوف الحجاب دا فى حد ذاته ستايل، وأنتي مثلا اخترتى إنك تكونى محجبة ودي طبعا حاجة حلوة ومقدرة، لكن إذا اختارتي الحجاب بلاش تكونى عين فى الجنة وعين فى النار، يعني متبقيش عايزة تلبسي لبس لغير المحجبات.
شاهد بالفيديو ..
اختارى القطع المناسبة للحجاب
وأضافت : علشان تبقي شيك لازم تلبسي لبس حجاب، ودا مش معناه تقفيل كتير وطبقات كتير، لأنه بيبوظ الشكل، اختارى حاجة من الأول مناسبة لحجابك، زى الكم الطويل والجيب والفساتين، طقم كامل على بعضه يكون واسع.
ألوان الطرح المناسبة للحجاب
وتابعت : فى اللبس دايماً بحب يكون محدد وعامل شكل ليكى مش واكل شكل جسمك، فبلاش الطرح تكون منقوشة بزيادة أو بألوان فاقعة، وبالتالي ملامحك مش هتكون باينة، الأفضل تكون الطرحة بألوان بيج، كريم، أسود أو جراي، بحيث تكون مكمل لـ اللوك بتاعك مش هى اللي مخبياكي.
اختارى ألوان فاتحة
وأكملت : بالنسبة لدرجات اللبس بعيدا عن الموضة أو لأ فالألوان الفاتحة بتكون أحلى للمحجبات لأن كل جسمك متغطي، فلما اللون يكون غامق كتير أو فاقع أوى بيكون مش مناسب أبدأ ليكي.
ألوان موضة 2026
وفى سياق متصل تحدثت علا شلبى عن درجات الألوان المنتشرة فى شتاء 26، وقالت : بالنسبة لألوان 2026، هنلاحظ أن اللون البنى لسه مكمل موضة بقاله سنتين، كمان اللون الزيتي واللون البرغندي بس اللى رايح شوية على موف أو بتنجانى أكتر، واللون الجراي موضة جدآ، وعايزة أقول إن لون السنة دي هو الأبيض، ودى حاجة غريبة جدآ لأنهم عمرهم ما طلعوا اللون الأبيض موضة.
