الجزء الثاني من سادس حلقات أبيض وأسود .. كواليس غسيل الكعبة وحب فؤاد المهندس لأم كلثوم
يكشف محمد المهندس، نجل الفنان الكبير الراحل فؤاد المهندس، خلال حديثه مع برنامج أبيض وأسود، الذي يقدمه الناقد الفني محمد شوقي، ويعرض عبر منصات آخر خبر TV، عن أسرار جديدة في حياة والده فؤاد المهندس، وكواليس مشاركته في غسيل الكعبة وعشقه لأم كلثوم.
قصة زواج فؤاد المهندس
وقال محمد المهندس عن قصة زواج والده : ماما من عيلة السرجاني، وزمان العباسية كانت فلل، وبابا عارف إن أمي من هناك وكان بيحبها علشان شخصيتها وكمان لأن هي شبه أم كلثوم، وكان أهل أمي كلهم بيحبوه، وكان هو الفاكهة بتاعتهم، وخطبها واتجوزها، وهي كانت خايفة إنه يكمل في التمثيل علشان ممكن ده يبعدهم عن بعض ويطلقوا.
بابا طلب إيد شويكار على المسرح
وقال محمد المهندس : بابا طلب إيد شويكار على المسرح، وقالها تتجوزيني يا بيسكوتة، وتابع بابا كان معاه محمد وأحمد وشويكار معاها منة، لما اتجوزوا اتفقوا إنهم مايخلفوش أطفال تاني، ومكنوش بيخرجوا ولا يسهروا من غير منة ولا محمد ولا أحمد، ولما كانوا بيتخانقوا مكانش لينا دعوة بيهم خالص.
وتابع : عمرنا ما سألناهم اطلقوا ليه، ولا عمرنا نسأل السؤال ده لأن دي حياتهم، وهما عودونا ناخد قرارنا في حياتنا لوحدنا، وهما اطلقوا مرتين، ومعرفناش ولا مرة منهم سبب انفصالهم إيه.
سر حب فؤاد المهندس لـ علاء ولي الدين
وعن سر حب الأستاذ لـ علاء ولي الدين قال محمد المهندس : اللي كانوا بيضحكوا بابا كتير جداً منهم نجيب الريحاني وعادل إمام وعبدالمنعم مدبولي، وكان برضو بيحب الضيف أحمد وسمير غانم، وتابع : من الفنانين الجداد كان بيحب علاء ولي الدين جداً، لدرجة أنه نزل وراح حضر له فيلم الناظر في السينما.
قصة اكتشاف الزعيم
وقال محمد المهندس : المقابلات اللي كانت بينهم حلوة قوي، وكان كل ما الزعيم يشوفه لازم يبوس راسه، ويقول هو اللي معلمني التمثيل، وكان دايماً الأستاذ عادل يسأل عليه، وكان يقول على الزعيم ابني البكري اللي مخلفتوش.
وتابع : لما اتقدم كذا حد لمسرحية أنا وهو وهي، فؤاد المهندس الوحيد اللي اختار عادل إمام والضيف أحمد، وكان عادل إمام بيظهر في الفصل التاني، والضيف أحمد في الفصل التالت، وأنا فاكر إن فؤاد المهندس بكي جداً لما الضيف اتوفى، وأصر أنه يكمل إخراج مسرحية كان بيحضر لها ويكتب اسمه عليها.
