عمرو سعد يكشف لـ آخر خبر تفاصيل فيلمي إحنا مش مع بعض وبطل غير عادي
حل النجم عمرو سعد ضيفًا على آخر خبر، وكشف خلال حديثه عن عدد من التفاصيل والأسرار الجديدة حول مشاريعه الفنية المقبلة، إلى جانب تفاصيل أفلامه السينمائية التي يستعد لتقديمها خلال الفترة المقبلة.
عمرو سعد : عايز أعمل أفلام كتير
وقال عمرو سعد خلال حواره مع آخر خبر : الفترة اللي جاية عايز أعمل أفلام كتير، والحقيقة عندي فيلمين، فيلم كوميدي إخراج الأستاذ شادي الرملي اسمه إحنا مش مع بعض، وفيلم تاني بعتبره حلم حياتي اسمه بطل غير عادي، وإن شاء الله أقوم بالتنسيق إن أنا أصور الفيلمين مع بعض.
عمرو سعد : بطل غير عادي حلم حياتي
وعن فيلم بطل غير عادي، قال عمرو سعد : حاسس إن ده من الأفلام اللي أنا أحب وأقدر أقدمها للسينما عشان بيحكي عن أَب، وبيحقق حلم بسيط جداً لبنته.
واستكمل : رغم بساطة الفيلم لكن مسّني قوي، وبقالي سنين بأجل فيه لغاية ما أكون جاهز إن أنا أقدم فيلم فيه كل مشاعر وخبرات اللي اتعلمتها في حياتي كلها.
بطل غير عادي فيلم عالمي
وأوضح عمرو سعد : الفيلم ده رغم بساطته، أنا بحلم إنه يبقى فيلم عالمي، ينفع الناس تشوفه في الهند وفي الصين، أمريكا وفي أوروبا، فيلم إنساني أوريجينال، مش متأخد من حاجة.
عمرو سعد : اشتغلت على الغربان 5 سنوات
وتابع : أَب مصري بسيط مع بنته، مفيش أي حاجة متاخدة من أي حاجة، ملهوش ريفرنس، وده مهم قوي إن يبقى عندنا إسهامات في السينما ملهاش ريفرنس، إحنا اللي عاملينها كمصريين يعني.
واختتم عمرو سعد حديثه قائلًا : عشان هو سطره بسيط ولغته بسيطة، وإنساني ينفع يروح أي حتة، أنا بحلم إن الدور ده يتعمل ويمثلنا في مهرجانات كبيرة، ويبقى تجاري كمان في بلاد كتيرة، وعندي حلم ليه كبير كده وبخططله، مش بحلم بيه كده وخلاص، عشان كده بقالي تلات سنين برضه شغال على الفيلم ده، غير الغربان اللي قعدت خمس سنين شغال عليه.
