ليلى زاهر تتصدر تريند جوجل بعد حديثها عن علاقتها بزوجها هشام جمال
تصدر اسم ليلى أحمد زاهر تريند محرك البحث جوجل، خلال الساعات الماضية، بعد حديثها عن علاقتها بزوجها هشام جمال، وتوضيحها عددًا من النقاط التي أثارت جدلًا عقب عرض حلقتهما في برنامج AB Talks مع الإعلامي أنس بوخش.
وكانت ليلى أحمد زاهر قد حرصت على توضيح حقيقة بعض التصريحات التي وردت في الحلقة، مؤكدة أن أجزاءً من الحوار تم اقتطاعها وتداولها بمعانٍ مختلفة عن سياقها الكامل، وكتبت ليلى عبر حسابها على إنستجرام : بحترم وبقدر ردود الأفعال واهتمامكم، بس حابة أوضح كام نقطة، لأن في أجزاء من الحلقة اتقطعت واتاخدت بمعاني غلط.
وأضافت : تصوير حلقة AB Talks حصل وأنا في أواخر شهور الحمل، وقبل التصوير إدارة أعمالنا بلغت فريق البرنامج إننا هنوصل متأخر لأني تعبت شوية، ولما وصلنا اعتذرنا لأنس وفريق البرنامج بالكامل على التأخير.
ليلى زاهر : طلبت من هشام يساعد في إدارة الحوار
وتابعت : وإحنا داخلين الاستوديو قلت لهشام إني لسه تعبانة وطلبت منه يساعد أكثر في إدارة الحوار لأني كنت تعبانة ولأن طاقتي بشكل عام أقل الفترة دي وده شيء طبيعي.
وعن موقف السفر الذي أثار الجدل بعد عرض الحلقة، قالت ليلى : موقف السفر حصل فعلًا، لكن بعدها لوحده اتكلم معايا وقالي إنه انتبه إنه تصرف غلط بحكم طريقة نشأة شباب كتير وإنه نوع تصرفات محتاج تصحيح وعلاج، وده كان تكملة كلامه الموجود في الحلقة الكاملة، والحقيقة إن من يومها محصلش موقف مشابه، وفكرة إن راجل ياخد باله ويحلل ويصارح بالمشكلة ويتغير عشانك هو أكيد شيء يحترم.
وعن علاقتها بهشام جمال، قالت ليلى زاهر : أنا اخترتك، وأنا كمان اخترته، لأن كتير من أسبابنا متشابهة، أكيد بحبه عشان طريقة تعامله معايا وكمان تعاملاته في حياته ومع الناس، وأكيد عشان شايفاه الأحسن والأنسب والأحلى في كل حاجة.
وأوضحت سبب حديثها عن اختيار هشام لها، قائلة : سبب ذكر الجملة دي في الحلقة هو نقاش عن الغيرة، وإنه كان بيأكدلي هو ليه عمره ما يشوف واحدة أحسن مني، مش لأنه بيشرح بطريقة متعالية زي ما الجزء اللي نزل كان بيتكتب عليه.
ليلى زاهر : علاقتي بهشام بدأت من 4 سنين
واستكملت : علاقتي بهشام بدأت من 4 سنين، وبقالنا حوالي سنة ونص متجوزين، وأنا أكثر واحدة عارفة تفاصيل علاقتنا وحياتنا واتفاقاتنا اللي بنحترمها وبتمشي علينا إحنا الاثنين.
وأضافت : أنا بتكلم عن شخص من يوم فرحنا لحد النهاردة كل أيامي معاه حلوة، بيعاملني بكل حب واحترام وتقدير، شخص من أول يوم في حملي مسابنيش في تعب، ولا سفر لشغلي، ولا زيارة دكتور، لأنه حاططني أولوية في حياته وقدر يحتويني بتغيرات مشاعري وأحاسيسي خلال تجربة جديدة علينا إحنا الاثنين.
عدينا أصعب مرحلة
وتابعت : أنا أقدر أحكم على اللي أنا عايشاه حاليًا، وهو إننا عدينا أول مرحلة من الجواز بيتقال عليها من أصعب المراحل، بحب وتفاهم وأتمنى نكمل كده وأحسن إن شاء الله بعيدًا عن التنبؤات المتشائمة المتأثرة بانتشار العلاقات السامة واللي هيلاقوا دايمًا زاوية تقلب أو تحور أي شيء إيجابي لسلبي حتى الكلام اللي أنا بكتبه دلوقتي.
واختتمت ليلى زاهر رسالتها قائلة : وإن شاء الله تشوفونا بعد سنين أكتر، ونكون مبسوطين ومتفاهمين أكتر وأقدر أنا كمان أخليه سعيد قد ما هو بيخليني مبسوطة في حياتي، وأخيرًا هطلب دعواتكم لينا وإحنا بنعيش واحدة من أسعد مراحل حياتنا وبنستعد نستقبل أول مولودة لينا إن شاء الله.
