عمرو ياسين : محمود ياسين جونيور أسرع مني في الكتابة ويشرفني العمل معاه
يواصل السيناريست عمرو محمود ياسين حديثه مع آخر خبر TV، وتحدث عن ابنه محمود ياسين جونيور، وأعماله التي قدمها من قبل، ومشروعه الجديد فيلم الأمير الذي يحضر له في الفترة الحالية.
وقال عمرو محمود ياسين : محمود شاطر جداً، وأنا متفاجئ من إنه بتجيله أفكار جديدة وحلوة، وعنده تفاصيل ذكية، وعنده فيلم الأمير، بيشتغل عليه كتير، لأن السينما بتحتاج 6 أو 7 تعديلات على السيناريو أو أكتر، وهو بيشتغل عليه كتير جداً، وبيسيبه ويرجعله تاني، لأنه كمان عنده كذا مشروع تاني، ودخل كتب كذا حلقة من المسلسل، وبعده يرجع للفيلم.
وتابع : هو أسرع مني بكتير في الكتابة، رغم إني زمان كتر سريع جداً وكنت بجنن الناس، وكانوا بيفتكروا إن حد بيكتب معايا، أنا دلوقتي علشان كتبت كتير إيدي تقلت، بعد ما كتبت حوالي 60 سكريبت.
يشرفني أشتغل مع محمود ياسين جونيور
وأضاف : يشرفني أشتغل مع محمود، وهستفيد منه جداً لأنه عنده روح شبابية وابن جيله، وساعات حد يقولي الكلمة دي غريبة قوي في سكريبت، فأقول لنفسي إيه ده هو أنا كبرت قوي كده، واللي بكتبه مبقاش موجود، بس بقيت بلقط منهم دلوقتي برضو.
رسالة دعم لزوجته
وكان قد تحدث عمرو محمود ياسين، من قبل عن مرض زوجته، وقال في تصريح خاص : الموضوع ده أصعب حاجة مريت بيها في حياتي، وبالنسبة لي إنها تمر باللي بتمر بيه ده أصعب اختبار، وعندي ثقة كبيرة في ربنا إن الفترة دي تعدي على خير، لأنها توأم روحي، وأنا بقولها إن شاء الله تبقى زي الفل.
وتابع : إحنا كنا خلصنا علاج، وابتدينا نشوف إيه الموقف، ولقينا لسه في حاجة فاضلة، وأضاف : أنا لقيت إني بعد كل عمل كبير بحصلي حاجة غريبة جداً، من زمان في مسلسل ونحب تاني ليه حد ضرب عليا نار علشان يسرق عربيتي، وفي مسلسل اللي ملوش كبير والدي اتوفي، وفي نصيبي وقسمتك عملت حادثة، ومرة ابني محمود في نصيبي وقسمتك تعب ومكناش عارفين سبب مرضه.
تفاصيل مسلسل وننسى اللي كان
ودارت أحداث مسلسل وننسى اللي كان، حول جليلة رسلان الممثلة - ياسمين عبدالعزيز- التي تجد نفسها محاصرة في شباك تهديد غامض يحول حياتها لساحة مطاردة؛ وهنا يتقاطع طريقها مع بدر - كريم فهمي -، الحارس الشخصي لها، ومع تصاعد وتيرة الخطر، تذوب الحدود بين الواجب والمشاعر، ليتحول بدر من درع واق لشريك في معركة عشق لا تخضع لقواعد الفنون القتالية، حيث يصبح الحفاظ على الحب أصعب من الحفاظ على الحياة.
أبطال مسلسل وننسى اللي كان
مسلسل وننسى اللي كان، من تأليف عمرو محمود ياسين وإخراج محمد الخبيري، وبطولة ياسمين عبدالعزيز، كريم فهمي، شيرين رضا، إيهاب فهمي، منة فضالي، خالد سرحان، محمد لطفي، محمود حافظ، منة عرفة، ليلى عز العرب، محمود عزب، عمر شرقي، أسما سليمان وآخرين، و الذي عرض عبر قناة MBC مصر في موسم رمضان2026، ليكون بذلك أول ظهور لـ ياسمين عبدالعزيز بعمل من بطولتها على شاشة القناة في موسم رمضان.
