أحمد سعد : علياء بسيونى لسه مراتى ونزلت بوست علشان هي عصبية
حلّ أحمد سعد ضيفًا على برنامج الحكاية، مع الإعلامي عمرو أديب، والمذاع عبر قناة MBC مصر، حيث تحدث عن علاقته بزوجته علياء بسيوني، وحقيقة طلاقهما مؤخراً.
علياء لسه مراتي
وقال أحمد سعد : علياء بسيوني ست مثالية، وهتفضل أم عيالي، وهي لسه مراتي لحد دلوقتي، والبوست إننا اتطلقنا 3 مرات اللي نزلته كان في لحظة عصبية.
الألبوم الفرفوش أهم ألبوم في حياتي
وقال أحمد سعد : الألبوم الفرفوش أهم ألبوم في حياتي، وبنبسط لما بفرّح الناس وسط زحمة الدنيا والشغل والمسؤوليات، ولو أنا مش مغني ما كنتش هلبس كده، والناس بتتجنن على الاستايل الغريب، لكن اللبس جزء من شغلي، واللي بلبسه في الحفلات مش بلبسه وأنا خارج مع أولادي.
وقال أحمد سعد : بحضر بعد رمضان لـ 5 ألبومات، ومهما كانت الدراما والإعلانات مهمة وبتنجح، بس دي حاجات بتضيف للمنتج مش بتضيفلي، وكنت عايز أعمل حاجة لنفسي، وضحيت بفلوس كتير بسبب إني بحضر 5 ألبومات جديدة في رمضان 2026.
تفاصيل الألبومات
وأضاف : الألبومات هتبتدي تنزل الفترة الجاية، والأول هيكون ألبوم أغاني دراما اسمه الألبوم الحزين مكون من 5 أغاني، والتاني للفرفشة والهزار، والثالث أغاني صيف بترقّص، والرابع أغاني قديمة بموسيقى عربية زي أغاني أم كلثوم، والألبوم الأخير أوركسترا.
فرحة مصر
وفي سياق أخر ، شارك أحمد سعد مؤخراً بالغناء في احتفالية فرحة مصر، يحضور السيدة انتصار السيسي، حيث حرص سعد على توجيه رسالة شكر إلى السيدة الأولى تقديرًا لدعمها واهتمامها بالشباب المصري المقبل على الزواج.
رسالة أحمد سعد للسيدة انتصار السيسي
وقال أحمد سعد في كلمته خلال الاحتفالية : طبعا كان ليا الفخر والشرف أن أكون موجود في مبادرة بتعملها بلدي الحبيبة لأحلي وأجمل عرايس، بشكر سيدة مصر وأمنا على سبيل العطاء، وعلى وجود حضرتك في يوم زي ده، ولينا الشرف والفخر إن حضرتك تبقي مهتمية بأولادنا وكل حبايبنا وعرايسنا،وقدم أحمد سعد خلال الاحتفالية عددًا من أغانيه، من بينها إيه اليوم الحلو ده ويا ابن المحظوظة، وسط تفاعل كبير وفرحة واضحة من الحضور والعروسين.
