مسرح مصر راجع ولا مش راجع ؟ .. محمد عبدالرحمن يجيب
كشف محمد عبدالرحمن خلال حواره مع آخر خبر TV، عن كواليس تجربته في تياترو مصر ومسرح مصر، كما تحدث عن أكثر الأشياء التي تعلمها من أشرف عبدالباقي، وحقيقة عودة مسرح مصر من جديد.
من غير تياترو مصر
قال محمد عبدالرحمن ردًا على سؤال ماذا كان سيحدث له بدون تياترو مصر ومسرح مصر : أول مسرحية في تياترو مصر كنت قبلها عامل الكبير، فكان وشي معروف إلى حد ما، والناس كانت تقول ده الواد بتاع الكبير.
وأضاف : الحمد لله الدنيا كانت بدأت تمشي، والناس في الوسط بدأت تعرفني، وأحمد الجندي استلذني، ومكي بقى صاحبي، وابتديت أقعد مع هشام ماجد وشيكو وفهمي، فكنت بدأت أخد خطوات كويسة الحمد لله.
وتابع : يمكن مسرح مصر أو تياترو مصر حرك الدنيا أكتر شوية، بس أنا كنت بدأت فعلًا، واشتغلت مع شريف عرفة في إكس لارج، وكنت عارف أحمد حلمي ودنيا وكل الناس.
ماذا تعلم من أشرف عبدالباقي؟
وتحدث محمد عبدالرحمن عن أكثر ما تعلمه من أشرف عبدالباقي، قائلاً : اتعلمت إن كل حاجة لازم تبقى مظبوطة، وإن الدنيا ماينفعش تبقى سداح مداح مهما كنت شاطر.
وأضاف : وإحنا في بداية مسرح مصر كنا عايزين نهزر مع الجمهور ونتفاعل زيادة، وكنا نستغرب لما أستاذ أشرف يقول خفوا الدنيا شوية، لكن بعد كده فهمنا إنه كان بيتكلم صح لأنك في لايف شو قدام الناس، وأي غلطة ممكن تبقى عواقبها كبيرة، فلازم تبقى موازن الدنيا من الأول.
هل يعود مسرح مصر؟
وعن إمكانية عودة مسرح مصر، قال محمد عبدالرحمن : مش عارف، ممكن آه وممكن لا، مفيش كلام في الموضوع ده لسه، ويمكن أكتر واحد عنده إجابة السؤال ده هو أشرف عبدالباقي.
وأضاف : إحنا والله ماكناش عايزين مسرح مصر يوقف، بس كانت فيه ظروف هي اللي خلته يقف، ولحد دلوقتي لما بنقعد مع بعض بنقول إننا ماكنّاش عايزينه يوقف.
واختتم : فكرة إنه يرجع تاني واردة، لكن الله أعلم بظروف الناس، وإجابة السؤال الحقيقية عند أشرف عبدالباقي.
