5 اختلافات بين 55 إسعاف و101 مطافي .. محمد عبدالرحمن يوضح
تحدث محمد عبدالرحمن خلال حواره مع آخر خبر TV لأول مرة عن كواليس فيلمه الجديد 101 مطافي، مؤكدًا أن العمل لا يتشابه مع فيلم 55 إسعاف، كما تحدث عن فكرة الفيلم ورسائله، والدعم الذي حصل عليه فريق العمل أثناء التصوير.
5 اختلافات مع 55 إسعاف
وقال محمد عبدالرحمن : مبدئيًا هو مش شبهه خالص، في الأول كنا هنسميه 66 مطافي بناءً على النوستالجيا في فيلم 55 إسعاف، بس حصلت مشاكل على الاسم فروحنا لحتة تانية خالص.
وأضاف : لكن كتشابه مفيش، بالعكس إحنا ماشيين في سكة مختلفة، وفيه فكرة حب مصر، إحنا واخدين الفكرة دي بشكل مختلف، إن ممكن أحب مصر وأنا مبسوط وبضحك، وممكن أحبها وأنا خايف عليها، المهم إن الإحساس يوصل بشكل حقيقي.
دعم وزارة الداخلية
وأوضح : أحنا اشتغلنا بضمير في كل أقسام الفيلم، ووزارة الداخلية متأخرتش عننا لحظة، والإدارة العامة للحماية المدنية وإدارة العلاقات العامة كانوا بيدونا كل الدعم والمساعدة طول التصوير.
وأضاف : كل التحية للحاج أحمد السبكي، الراجل ده كان شايل هم الفيلم جدًا، وإن شاء الله نكون قدمناه بشكل كويس.
روح الفيلم
وتابع : الضحك في الفيلم خارج من الموقف، وأنا شايف إن ضحك الموقف لازم يتشاف مش يتحكي، وإن شاء الله الناس تتقبل الفيلم وتضحك زي ما إحنا كنا متخيلين.
دوره في 101 مطافي
واختتم : أنا بعمل دور فرد من أفراد الحماية المدنية، عنده صاحب والاتنين لقوا بعض في الدنيا لأنهم مقطوعين من شجرة، وبيحصل بينهم موقف يخليهم يدخلوا المجال ده، وبعدين الأحداث بتاخدهم في اتجاهات مختلفة، وهي علاقة مختلفة عن 55 إسعاف تمامًا في الحدوتة والتفاصيل.
أحدث أعمال محمد عبدالرحمن
وانتهى محمد عبدالرحمن توتا مؤخراً من تصوير فيلمه الجديد 101 مطافي، والذي يشاركه بطولته محمد أسامة أوس أوس، وتدور أحداثه في إطار كوميدي اجتماعي.
تفاصيل فيلم 101 مطافي
فيلم 101 مطافي من بطولة محمد عبدالرحمن، أوس أوس، هدى الإتربى، وبيومي فؤاد، عبدالرحمن ظاظا، كما تشارك شيماء سيف كضيفة شرف خلال أحداث الفيلم وتجسد دور ممثلة، وإنتاج أحمد وكريم السبكي، تأليف ضياء محمد، وإخراج محمد أمين.
