مدين : مزعلتش من عمرو دياب بعد استبعاد أغنيتي من ألبوم ابتدينا
حل الملحن مدين، ضيفاً على آخر خبر TV، وتحدث خلال اللقاء عن كواليس أعماله الموسيقية، وتعاونه مع الهضبة في ألبومه المقبل، وذلك بعد استبعاد أغنيته مع عمرو دياب من ألبوم ابتدينا.
وقال مدين : عمرو دياب مش بيقدر يقول على حاجة نازلة أو مش نازلة، وهو طبعاً معذور، لأنه بحجم تاريخه وأعماله لحد آخر لحظة في الألبوم بيكون عنده جديد.
وتابع : أنا زي ما دخلت بأغنية في آخر لحظة في ألبوم بيوحشني، مزعلتش لما مدخلتش بأغنية في الألبوم اللي فات، وباركت لكل الناس وقولت نصيبي كده، واتمنى تنزل في الألبوم الجديد.
مدين يتحدث عن اللحن الأقرب له من أعماله
وتحدث مدين من قبل عن اللحن الأقرب له من أعماله، وقال : أقرب لحن ليا من ألحاني هو كلام عينيك، وكنت شايف إنه لازم ينجح أكتر، ولسه كنت بتكلم في الموضوع ده، وكنت بقول إن الناس هتاخد فترة تسمع أغنية مازال على البال، وحاسس إن الأغنية دي ماخدتش حقها خالص، ولسه ماخدتش القدر اللي تستحقه.
وتابع : أفضل أغنية عملتها لشيرين كلام عينيك، وبالنسبالي هي من أجمل الألحان ليا معاها، لأني وأنا بلحن الأغنية دي، كنت حاسس إني عامل لحن عالمي، ولما مانجحش، كنت حاسس إن في حاجة غلط.
من شيرين لـ أحمد سعد
كما كشف مدين من قبل عن كواليس انتقال أغنية أنا مش فاهمني، وقال : كلمت الشاعر أحمد عيسى وقولتله عايز أعمل حاجة زي أنا كتير، والحاجات اللي فيها المعاناة الشخصية، وأي حد يسمعها يحس إنها بتتكلم عنه، وبصراحة فاجئني بكلمات حلوة قوي، وأنا قعدت أشتغل وخلصتها.
وتابع : كلمت حمدي بدر، وقولتله معايا أغنية من أهم الأغاني اللي عملتها في حياتي، وكان في تتر مسلسل مهم كانت مرشحة تغنية شيرين عبدالوهاب، وبعدها اترشحت بوسي للتتر، وبعدها اتغير المطرب، وبعدها حمدي قالي أنا هعرضها على أحمد سعد، وهو طار بيها وكان في فرحة حسستني بنجاح التجربة قبل ما تنزل.
نجاح أنا مش فاهمني
واحتفل الملحن محمد مدين بتصدر أحدث أعماله الغنائية أنا مش فاهمني، للمطرب أحمد سعد، تريند موقع الفيديوهات يوتيوب بعد أيام من طرحها ضمن ألبومه الحزين لموسم الصيف 2026.
أحدث أعماله
ويستعد الملحن مدين، لمشاركة تامر عاشور في ألبومه الغنائي الجديد خلال الفترة المقبلة، والذي يشهد تعاونًا فنيًا مميزًا مع عدد من مختلف الشعراء والملحنين، حيث يشارك في الألبوم بـ أغنيتين من ألحانه، تحملان الطابع الدرامي الذي اعتاد الجمهور عليه في تعاونات الثنائي الناجحة سابقًا.
