حسن الرداد يكشف عن تفاصيل دوره في طه الغريب
حل حسن الرداد ضيفًا على آخر خبر TV، وكشف خلال اللقاء تفاصيل دوره في فيلم طه الغريب، إلى جانب حديثه عن أبطال العمل.
تفاصيل دوره في الفيلم
وقال حسن الرداد : شخصية طه الغريب، شخصية مختلفة بالنسبة لي، وحاجة أنا ملعبتهاش قبل كده، وأنا بحب الشخصيات اللي فيها تركيبة نفسية مختلف، هو تركيبته النفسية مرّ بتجارب كتيرة جدًا أثرت عليه بشكل كبير، وهو بيعبر عن ناس كتيرة جدًا موجودين في الحياة، علاقة الإنسان بالآخر دايمًا بيبقى ليها تأثير نفسي عليه بالإيجاب أو بالسلب.
وأضاف : لو في تأثير بالسلب على الشخص ده ممكن يوديه لفين ممكن يأثر فيه لدرجة إيه؟ هل يدفعه للنجاح في حياته ولا هل هيضيعه، بس هو التركيبة النفسية بتاعة طه غريب تركيبة صعبة قوي وحلوة أوي في نفس الوقت وفيها تحدي ليا كممثل، فأنا مستمتع جدًا لأني طول الوقت بفكر وطول الوقت بقرأ وبتسأل، وشخصية من دم ولحم تحس إن أنت بتشوف نفسك أو بتشوف صاحبك أو حد قريب شفته فيها، وبتتكلم عن معنى حلو أوي، حاجة إحنا عايشينها يوميًا، وحتى في مشاكل كتيرة إنت بتشوفها عند ناس بسبب تأثير الآخر عليك، أو تأثير الحياة عليك أو كده.
شاهد بالفيديو ..
أبطال فيلم طه الغريب
فيلم طه الغريب بطولة حسن الرداد، تارا عماد، بيومي فؤاد،مي القاضي، مها نصار، تامر هاشم، محمد علي رزق، ومن تأليف محمد صادق وإخراج عثمان أبو لبن وإنتاج أحمد السبكي، وتدور أحداث الفيلم حول قصة حب قوية تتجاوز الزمن، ويعيش طه الشاب الذي يضحي بكل شيء من أجل ذكرى من يحب، وسط صراع درامي مع فتاة تتحدّاه لتعيد قلبه للخفقان من جديد.
تعاون حسن ودنيا سمير غانم
وكان قد تحدث حسن في تصريح خاص لـ آخر خبر عن إمكانية تعاونه مع دنيا سمير غانم في عمل سينمائي قريباً، ونوعية الأعمال التي يتمنى تقديمها معها، وقال : أتمنى أكيد، دنيا فنانة كبيرة ومهمة، وفنانة أعتقد هي الوحيدة تقريبًا اللي تعتبر فنانة شاملة، تقدر تعمل استعراض، وتقدر تعمل تراجيدي، وتقدر تعمل كوميدي، وناجحة في كل ده بنفس القوة.
وتابع : هي فنانة طبعًا مهمة جدًا جدًا، وبشوفها من حوالي 20 سنة فاتوا ولحد دلوقتي فنانة مميزة جدًا، وأكيد أحب أعمل معاها فيلم،وعن نوعية الأعمال التي يتمنى تقديمها معها، اختتم حديثه: حاجات كتير، أحب أعمل معاها فيلم رومانتيك مثلاً.
