حسن الرداد يتحدث عن كواليس آخر يوم تصوير في فيلم طه الغريب
حلّ حسن الرداد ضيفًا على آخر خبر TV من داخل لوكيشن تصوير فيلم طه الغريب، حيث كشف كواليس دوره والتجربة بالكامل، خاصة مع وصول فريق العمل إلى آخر يوم تصوير.
وقت طويل في تحضيرات
وقال حسن : إحنا دلوقتي في لوكيشن البيت بتاعي في فيلم طه الغريب، والمكان ده مش مجرد ديكور، ده بيعبّر عن الحالة النفسية للشخصية اللي بقدمها، وكل التفاصيل اللي فيه ليها علاقة بالدراما اللي بيمر بيها، وإحنا الحقيقة خدنا وقت طويل جدًا في التحضير قبل ما نبدأ، لكن أول ما دخلنا التصوير كانت التجربة ممتعة جدًا، الشغل مع المخرج عثمان أبو لبن دايمًا بيبقى فيه تحديات، وده بيخليني متحمس أكتر، وهو دايمًا بيطلب حاجات جديدة ومختلفة من الممثل.
وأضاف : أنا مثلًا مكنتش بركب موتوسيكلات خالص، فكان لازم أتعلم من الأول علشان الشخصية، وكمان عندي مشاهد عزف بيانو، فكنت محتاج أتدرب كويس جدًا، أنا دارس في المعهد العالي للفنون المسرحية، وكان عندنا مواد موسيقى كتير في كل ترم زي الفوكاليز وقراية النوتة وعزف البيانو، وده إداني خلفية كويسة، لكن برضه لازم الواحد يتدرب علشان إيديه تبقى مظبوطة قدام الكاميرا.
تحديات جديدة
وتابع : أنا بحب جدًا إن يبقى في تحديات جديدة في أي دور، وبحب أذاكر الحاجة كويس وأشتغل عليها، والحاجات الصعبة في التصوير بالنسبة لي بتبقى ممتعة أكتر، وفيه كيميا كبيرة بيني وبين عثمان أبو لبن، وده بيخليني مرتاح جدًا في الشغل معاه، الكرو كله كان متعاون جدًا، وشركة الإنتاج بقيادة أحمد السبكي وفرت كل حاجة علشان الشغل يطلع بشكل كويس.
واختتم حديثه : ومبسوط جدًا بالشغل مع النجوم اللي في الفيلم، خصوصًا تارا عماد، لإن بينا مشاهد كتير في نفس الديكور، وأنا استمتعت جدًا بالشغل معاها، والتجربة كلها كانت جميلة وممتعة جدًا.
أبطال فيلم طه الغريب
فيلم طه الغريب بطولة حسن الرداد، تارا عماد، بيومي فؤاد،مي القاضي، مها نصار، تامر هاشم، محمد علي رزق، ومن تأليف محمد صادق وإخراج عثمان أبو لبن وإنتاج أحمد السبكي، وتدور أحداث الفيلم حول قصة حب قوية تتجاوز الزمن، ويعيش طه الشاب الذي يضحي بكل شيء من أجل ذكرى من يحب، وسط صراع درامي مع فتاة تتحدّاه لتعيد قلبه للخفقان من جديد.
