تيراميسو صحية على طريقة الشيف هويدا فرغلي في رمضان بالهنا
دائماً ما يشغل جدول إفطار رمضان بال السيدات، وتقعن في حيرة كبيرة، طوال الشهر الكريم، ويبقى السؤال المكرر : هنفطر إيه النهارده؟، هو ما يشغل بال الكثيرين، وهو ما يجيب عنه آخر خبر من خلال برنامج رمضان بالهنا، والذي يقدم يومياً وصفة جديدة لمتابعي ومشاهدي آخر خبر TV.
تيراميسو صحية على سفرة رمضان
وقامت الشيف هويدا فرغلي بتقديم وصفة تيراميسو صحية فى الحلقة التاسعة عشر من برنامج رمضان بالهنا، وقالت : كل سنة وأنتم طيبين بمناسبة شهر رمضان الكريم، النهارده حبيت أقدم لكم وصفة سحور مختلفة ومبتكرة، وهي التيراميسو لكن بطريقة صحية وخفيفة جداً تعتمد على الزبادي اليوناني، عشان تكون مريحة للمعدة في السحور وبعيدة عن الحلويات الدسمة.
شاهد بالفيديو ..
المكونات
بسكويت التيراميسو الأصلي -ليدي فينجرز، وقهوة إسبريسو ثقيلة، وزبادي يوناني، وجبنة ماسكاربوني أو أي جبنة كريمية تحبوها، وعسل نحل طبيعي أو سكر ستيفيا للتحلية، وفانيليا سائلة، وطبعاً كاكاو خام للتزيين.
طريقة تحضير الوصفة
أول خطوة بنبدأ بيها هي تغميس البسكويت في قهوة الإسبريسو بسرعة جداً عشان ما يدوبش مني، وبحطه في طبق التقديم كقاعدة أساسية، أنا بفضل النوع ده من البسكويت لأنه بيدي القوام الصح للتيراميسو.
بعد كده بجهز الكريمة، بجيب وعاء وبحط فيه معلقتين كبار من جبنة الماسكاربوني مع علبة الزبادي اليوناني. بضيف عليهم شوية قهوة صغيرين ورشة فانيليا، وبحلي الخليط بمعلقة كبيرة عسل نحل أو سكر ستيفيا حسب رغبتكم. بخلط كل ده كويس لحد ما القوام يبقى كريمي وناعم ولونه 'كافيه' فاتح وجميل.
في النهاية، بصب الكريمة فوق البسكويت وبوزعها بالتساوي، وبرش رشة كاكاو خام على الوش عشان تدي الشكل والطعم المعروف للتيراميسو. الأفضل إننا نسيبها في الثلاجة حوالي ساعتين عشان تبرد وتتماسك وتبقى جاهزة للأكل.
نصيحة سريعة
لو مستعجلين، تقدروا تعملوا تريند الزبادي اليوناني السريع، افتحوا علبة الزبادي وضيفوا عليها القهوة والعسل والفانيليا وكسروا فيها شوية بسكويت، وكده يبقى عندكم أحلى وأخف سحور مشبع في دقايق.
