دكتورة تخاطب .. نجلاء بدر تتحدث عن دورها في مسلسل اللون الأزرق
قبل انطلاق عرض مسلسل اللون الأزرق، بطولة جومانا مراد وأحمد رزق، بدءً من غدءً 15 رمضان، حرص آخر خبر TV على إجراء حوار مع نجلاء بدر، إحدى بطلات العمل، من داخل لوكيشن التصوير، وكشفت خلال اللقاء عن تفاصيل شخصيتها وأبرز ملامح الدور الذي تقدمه ضمن أحداث المسلسل.
دكتورة تخاطب
وقالت نجلاء : بقدم شخصية فريدة، دكتورة تخاطب مع حمزة بطل المسلسل، وهو حالة من حالات أو طيف من أطياف التوحد.
شاهد الفيديو ..
وعن التحدي الأساسي في التعامل مع حالة حمزة، قالت : أنا بالنسبة لي كانت كل حاجة جديدة خالص، إنتي لما بتعملي شخصية لازم تدرسيها كويس، والشخصية دي ما بتجبهاش من خيالك، إنتي لازم تعرفي الدكاترة بيتعاملوا إزاي، ولازم تفهمي طفل الأوتيزم Autism هو إيه، وحالته إيه، أو إيه مشكلته، أو إيه أصلاً يعني إيه مرض توحد أو أوتيزم.
التوحد مش مرض
وأضافت : هو مش مرض، أنا اكتشفت لما سألت أول سؤال هو يا جماعة مرض عضوي؟ لا، طب مرض نفسي؟ لا، أُمال هو إيه؟، فكانت علامة استفهام كبيرة جداً في حياتي، وده اللي خلاني أدخل أدرس حالات الأوتيزم، مشفتهاش كلها طبعا، يمكن أنا شفت 7 أو 8 أطياف اللي قدرت أحضرهم، وأنا كدكتورة دوري إيه مع الطفل ده ومع كل طفل من الأطياف دي، وخصوصاً الطيف اللي فيه حمزة.
المجتمع يعقد رحلة العلاج
وعند سؤالها عن المجتمع بيساعد ولا بيعقد رحلة العلاج؟، قالت : بيعقدها، لأنه مش فاهم، مريم نعوم كان ليها هدف إنها تعمل توعية بحالة الأوتيزم أصلاً، أو التوحد، هو إيه أصلا التوحد وكيفية التعامل معاه من خلال الأم والأب ومن خلال المجتمع، وإنه إزاي يتعرف على المجتمع.
واختتمت: والإدراك إن فيه دور طبي في الموضوع، هل الطبي ده أدوية وهناخد حقن؟ لا، هو تدريبات في إنه يخرج من العالم الصغير للعالم الكبير الحقيقي اللي حواليه.
تفاصيل مسلسل اللون الأزرق
مسلسل اللون الأزرق مكون من 15 حلقة، ويُعرض في النصف الثاني من شهر رمضان، ومن تأليف مريم نعوم وإخراج سعد هنداوي، ومن إنتاج شركة الباتروس، والعمل من بطولة أحمد رزق ويشارك فيه إلى جانبه كل من: جومانا مراد، نجلاء بدر، رياض الخولي، أحمد بدير، حنان سليمان، يارا قاسم، وآخرين.
