أول يوم رمضان عند ماما ولا حماتى؟ .. نادين جاد تٌجيب
أول يوم عند ماما ولا حماتى؟، سؤال مازال يخلق الكثير من الخلافات بين الأزواج فى أول أيام شهر رمضان الكريم، وما بين اختيار إرضاء طرف على الآخر، يقف الأزواج فى أغلب الوقت مكتوفين الإيدى لإرضاء أهلهم.
اللي أوله شرط آخره نور
وتحدثت خبيرة الإتيكيت نادين جاد، عن إتيكيت عزومة أول يوم فى شهر رمضان، وقالت فى حوار خاص لـ آخر خبر TV : الإتيكيت بيقول اللي أوله شرط آخره نور، كله بالاتفاق، من غير خناقات، وكل عيلة حسب عاداتهم، لو أهل الزوج موجودين يبقى أول يوم عند أهل الزوج، الفكرة كلها إننا منكسرش بخاطر حد، نفطر عند حد ونتسحر عند حد تاني، طيب رمضان دا نفطر عند ماما، واللي جاي يكون عند أهل الزوج، المهم الطرفين يكونوا متفقين.
شاهد بالفيديو ..
الإتيكيت قابل للتعديل والتغيير
وتابعت : لو هما من عيلة أو من بلد فيها عادات وتقاليد، أن أول يوم عند أهل الزوج، وأهل الزوج متواجدين بنسافرلهم أو بنروح عندهم يبقى اه، وللعلم أى أم بتحب أن بنتها تكون سعيدة، يعني لو جرى العُرف أن يبقى أول يوم رمضان عند أهله يبقي لازم نستجيب، على فكرة الإتيكيت قابل للتعديل والتغير فى حدود العادات والتقاليد والأصول الدينية، طالما مش بنخاف دول ومش بكسر بخاطر حد وذوق مع الناس يبقي كله ماشى.
العيلة أولاً ثم الأصدقاء وزملاء العمل
وفى سياق متصل، تحدثت نادين جاد خبيرة الإتيكيت من قبل عن ترتيب العزومات فى شهر رمضان، وقالت : بالنسبة للعزومات بتكون للأهل من الدرجة الأولى فى أول أسبوع من شهر رمضان الكريم ، يعني الأب والأم والحماة والأخوات من الطرفين أو المقربين من الدرجة الأولى، وبالنسبة بقى لتاني وتالت أسبوع من رمضان، فبنحددهم للأصدقاء والجيران والزملاء فى العمل، وبرضو بيكون عن طريق مكالمة تليفون لكل شخص بنشوف اليوم المناسب معاه.
عزومة آخر أسبوع فى رمضان
تابعت: أما آخر أسبوع فى رمضان فدا بيكون مخصص للعبادة بقى وتحضير نفسنا للعيد، ولو حبينا بتكون العزومات واخدة طابع الديش بارتي أو الأكلات الخفيفة عشان أغلب الناس بيكونوا زهقوا من الأكل الدسم.
