تعملى إيه لو عندك عزومة فى البيت؟ .. نادين جاد توضح
تحضير العزومات يستغرق من السيدات وقت ومجهود بدني كبير، خصوصا عزومات شهر رمضان التي تتميز بطابع مختلف، ورغم حرص العازمين على تحضير سفرة رمضان مميزة فى بيتهم، إلا أن هناك بعض الأخطاء التي تعطى انطباع غير جيد، يجب أن تتجنبوها حتى لا تتركوا انطباع سيء مع المعزومين
نصائح ترتيب البيت قبل العزومة
وتحدثت نادين جاد خبيرة الإتيكيت عن الطرق الصحيحة لاستعداد السيدات لاستقبال ضيوفهم فى عزومات رمضان، وقالت فى حوار خاص لـ آخر خبر Tv : في البداية لو العزومة عندك، هتحطى خطة لتنظيف البيت وتظبيطه، وتنضيف الحمام اللي كل الضيوف هيدخلوه يعني ناشف واضاءته كويسة وفيه فوط لازم، والدنيا مظبوطة فيه تماماً، وياربت حد يتأكد أنه تمام خلال وجود الضيوف فى البيت، أما بالنسبة للبيت بشكل عام لازم يكون نضيف ومتهوى والإضاءة كويسة، وأبقى عارفة الضيوف هيقعدوا فين، يعني الأكل علي السفرة، طيب مكان الشاى والحلويات فين وهكذا.
شاهد بالفيديو ..
جهزي العصاير والحلو قبل العزومة
وتابعت : ومن قبلها بيوم استعدى بتحضير العصاير عشان تقدرى تدوقيها مينفعش نجرب فى الضيوف، كمان جهزى الأطباق، المعالق، الشوك والسكاكين والكوبايات، غير الصواني كل التفاصيل دي لازم تجهيزها من قبلها. برضو لو فكرتى تعملى الحلو فى البيت يبقى تجهزين قبلها بيوم، واوعوا تجربوا فى الضيوف طريقة جديد أول مرة تعمليها.
إزاى تستقبلى ضيوفك فى رمضان
وأضافت : نيجي بقى لصاحبة البيت، إدي نفسك الوقت إنك تجهزي وتظبطى نفسك لاستقبال الضيوف بملابس مناسبة للعزومة إنتى وأولادك، وعلى فكرة إنتى اللي لازم تستقبلى ضيوفك مش الأطفال ولا الأب، كل دا هتستعدى ليه قبل ما الضيوف يوصلوا بربع ساعة مثلا، طبعا الابتسامة تكون علي وشك و توجهيهم للمكان اللي هما المفروض يقعدوا فيه، وقبل الفطار بكام دقيقة تقولى اتفضلوا علي السفرة.
العيلة أولاً ثم الأصدقاء وزملاء العمل
وفى سياق متصل تحدثت نادين جاد خبيرة الإتيكيت عن ترتيب العزومات فى شهر رمضان وقالت: بالنسبة للعزومات بتكون للأهل من الدرجة الأولى فى أول أسبوع من شهر رمضان الكريم ، يعني الأب والأم والحماة والأخوات من الطرفين أو المقربين من الدرجة الأولى، وبالنسبة بقى لتاني وتالت أسبوع من رمضان، فبنحددهم للأصدقاء والجيران والزملاء فى العمل، وبرضو بيكون عن طريق مكالمة تليفون لكل شخص بنشوف اليوم المناسب معاه.
عزومة آخر أسبوع فى رمضان
تابعت: أما آخر أسبوع فى رمضان فدا بيكون مخصص للعبادة بقى وتحضير نفسنا للعيد، ولو حبينا بتكون العزومات واخدة طابع الديش بارتي أو الأكلات الخفيفة عشان أغلب الناس بيكونوا زهقوا من الأكل الدسم.
