وداعاً للـ Over size .. علا شلبى خبيرة الصورة والمظهر توضح
مع بداية كل عام جديد نتابع اتجاه الموضة بشكل عام، سواء فى قطع جديدة أو ألوان أكثر موضة أو حتى فى ستايل الشنط والأحذية، وبالتزامن مع بداية شتاء 2026، ظهرت العديد من القطع المسيطرة على موضة السيزون.
شاهد بالفيديو ..
وتحدثت علا شلبى خبيرة الصورة والمظهر عن موضة شتاء 2026، فى حوار خاص لـ آخر خبر TV، وقالت : خليني الأول أوضح اتجاه الموضة رايح فين بشكل عام، يعني فى 2025 كانت رايحة ناحية الراحة الـ oversized، لكن فى 2026 الدنيا بدأت تتغير شوية، شايفين حاجة اسمها minimalism.
قطع موضة فى 2026
وتابعت : ابتدينا نشوف الإكسسوارات حجمها كبير، تطريز كتير والتفاصيل أكتر، غير السنين اللي فاتت كنا شايفين الـ quietlook يعني كل حاجة شكلها بسيط، حتى هنلاحظ أن الأكمام طويلة شوية ومنفوشة وفيها شغل جامد، كمان الوسط بقى مُحدد أكتر مش oversize زي قبل كدا، الأكتاف عريضة ووسط صغير.
وأضافت : كمان طلعت موضة الجيبات المنفوشة ومحددة الوسط صغير، وهنشوف مثلا البونشو من القطع اللي طالعة موضة أوى فى سيزون شتاء 2026، ودا بتوضح أن خطوط الموضة اتغيرت شوية عن قبل كدا.
موضة Gen Z في 2026
واكملت : أما بقى GenZ هما مش بيمشوا مع المتعارف عليه فى موضة الفترة دي، لكن بيتجهوا أكتر ناحية اللي بيريحهم، فهما لسه فى حته الراحة، يعني سويت شيرت oversized وبنطلون واسع سواء الباجى أو الـ joggers، طبعا الـ UGGS منتشرة جدا والسنيكرز، كل ما هو مريح فى اللبس دا الأفضل بالنسبة ليهم.
ألوان موضة 2026
وعن الألوان الموضة هذا العام، قالت : بالنسبة للألوان الموضة فى 2026، هنلاحظ أن اللون البنى لسه مكمل موضة وبقاله سنتين، كمان اللون الزيتي واللون البرغندي بس اللى رايح شوية على موف أو بتنجانى أكتر، واللون الجراى موضة جدً، واختتمت : عايزة أقول إنهم أعلنوا أن لون السنة فى 2026 هو الأبيض، ودى حاجة غريبة جداً لأنهم عمرهم ما طلعوا اللون الأبيض موضة.
